Mamlakatimizda sportning barcha sohalarini rivojlantirish, xalqimizni sportga ommaviy tarzda jalb etish, ayniqsa, kelajagimiz egalari bo‘lgan yosh avlodni har jihatdan yetuk va komil insonlar sifatida ulg‘aytirishga yuksak darajada e’tibor qaratilmoqda.

Bu borada sportni ommaviylashtirish, xususan, bolalar sportini rivojlantirish borasida sohaga yetuk va professional kadrlarni jalb etish, ularni malakasini davomli tarzda oshirib borish eng muhim vazifalardan biridir.

Kecha O‘zbekiston davlat jismoniy tarbiya va sport universitetida O‘FA vakillari hamda oliygoh rahbariyati, futbol kafedrasi o‘qituvchilari bilan uchrashuv bo‘lib o‘tdi.

Uchrashuvda O‘FA va universitet o‘rtasida hamkorlikni kengaytirish, bolalar-o‘smirlar, qizlar va professional futbolni rivojlantirish borasida o‘zaro fikr almashildi. Bir qator futbol mutaxassislarini, xususan, murabbiylar, hakamlar, seleksioner, tahlilchi, sport psixologlari va marketing mutaxassislarini tayyorlashda hamkorlikda ish tashkil etish masalasi muhokama qilindi.

Shuningdek, suhbat davomida O‘FA mutaxassislari va universitet o‘qituvchilarining o‘zaro tajriba almashishlarini yo‘lga qo‘yish, xorijiy va mahalliy professorlarni mashg‘ulotlarga jalb etish borasida kelishuvga erishildi.