Мамлакатимизда спортнинг барча соҳаларини ривожлантириш, халқимизни спортга оммавий тарзда жалб этиш, айниқса, келажагимиз эгалари бўлган ёш авлодни ҳар жиҳатдан етук ва комил инсонлар сифатида улғайтиришга юксак даражада эътибор қаратилмоқда.
Бу борада спортни оммавийлаштириш, хусусан, болалар спортини ривожлантириш борасида соҳага етук ва профессионал кадрларни жалб этиш, уларни малакасини давомли тарзда ошириб бориш энг муҳим вазифалардан биридир.
Кеча Ўзбекистон давлат жисмоний тарбия ва спорт университетида ЎФА вакиллари ҳамда олийгоҳ раҳбарияти, футбол кафедраси ўқитувчилари билан учрашув бўлиб ўтди.
Учрашувда ЎФА ва университет ўртасида ҳамкорликни кенгайтириш, болалар-ўсмирлар, қизлар ва профессионал футболни ривожлантириш борасида ўзаро фикр алмашилди. Бир қатор футбол мутахассисларини, хусусан, мураббийлар, ҳакамлар, селекционер, таҳлилчи, спорт психологлари ва маркетинг мутахассисларини тайёрлашда ҳамкорликда иш ташкил этиш масаласи муҳокама қилинди.
Шунингдек, суҳбат давомида ЎФА мутахассислари ва университет ўқитувчиларининг ўзаро тажриба алмашишларини йўлга қўйиш, хорижий ва маҳаллий профессорларни машғулотларга жалб этиш борасида келишувга эришилди.
