Xabaringiz bor, “Mash’al” (Muborak) bilan o‘tkazilgan nazorat uchrashuvidan so‘ng (2:2), “Sho‘rtan” jamoasi tayyorgarlik jarayonlarining ikkinchi bosqichini yakunladi.

Bevosita muborakliklarga qarshi bahs borasida to‘xtaladigan bo‘lsak, ob-havo sovuqligi biroz o‘yin borishiga o‘z ta’sirini ko‘rsatdi, ammo uchrashuv foydali bo‘ldi. Chunki “Mash’al” kuchli jamoalar sirasiga kiradi va qolaversa, muborakliklar oldiga ham jiddiy maqsad qo‘yilgan.

Mazkur o‘yindan keyin futbolchilarga bir necha kunlik xordiq berilgandi. Endilikda “Oq bo‘rilar” jamoasi mashg‘ulotlarni 24 yanvardan G‘uzordagi o‘z qarorgohida davom ettirishmoqda.

Yangi mavsum uchun tayyorgarlik ayni qizg‘in pallasida. Erkin agent maqomidagi futbolchilar iqtidorlarini namoyon qilgan holda futbol klublari orqali saralanib olinmoqda. An’anaga sodiq qolgan holda “Sho‘rtan” futbol klubi ham tayyorgarlik jarayonini boshlaganidan buyon asosiy e’tiborni malakali futbolchilarni saralab olishga va ularning jismoniy holatiga qaratgan.

Murabbiylar shtabi seleksiya ishlarini davom ettirib, tarkibni shakllantirishga harakat qilishmoqda. "Sho‘rtan" safiga yana bir qator o‘yinchilar kelib qo‘shildi. Bular: Davron Isoqov - hujumchi  “Buxoro”, Nodirbek Abduxoliqov - qanot himoyachi “AGMK”, Farhod Imomov - himoyachi “AGMK”, Abduvohid Sharipov - himoyachi “Navbahor” va Akobir Qayumov - darvozabon “Bunyodkor”.

Reja bo‘yicha, 29 yanvar kuni G‘uzorning BO‘SM maydonida navbatdagi sinov nazorat uchrashuvi doirasida vakillarimiz Samarqandning “Dinamo” futbolchilari bilan bahs olib borishadi.

“Sho‘rtan” matbuot xizmati bo‘limi.