O‘zbekiston futbol assosiasiyasida Tojikistonda o‘tkazilgan “CAFA Womenʼs Futsal Championship 2022”  musobaqasida muvaffaqiyatli ishtirok etgan O‘zbekiston ayollar futzal terma jamoasi bilan uchrashuv bo‘lib o‘tdi.

Tadbir avvalida O‘FA birinchi vise-prezidenti Ravshan Ermatov futzalchilarimizni O‘FA prezidenti Abdusalom Azizov, qolaversa, butun futbol jamoatchiligi nomidan musobaqadagi muvaffaqiyatli ishtirok bilan tabrikladi. Ushbu natijaning ortida yurtimizda ayollar futboliga berilayotgan e’tibor, qolaversa ahillik va jamoaviy mehnat yotganini ta’kidlab o‘tdi.

“Ayollar futbolini yangi bosqichga olib chiqish va rivojlantirish yo’lida O‘FA yaponiyalik tajribali murabbiylarni jalb qildi. Hammamizga ma’lum, Yaponiya Jahon chempionatida doimiy ishtirok etib keladi, mutaxassislari ham xalqaro miqyosda katta tajribaga ega hisoblanadi. Shu sababli, ayollar futboliga Midori Honda bosh murabbiy etib tayinlandi, umid qilamizki, Sizlar ushbu yangi murabbiy bilan oldimizga qo‘yilgan yuqori maqsadlarga erishish yo’lida tinmay mehnat qilib, o‘z ustingizda ishlab borasizlar”, deya ta’kidladi Ravshan Ermatov.

Shuningdek, O‘zbekiston ayollar terma jamoasi bosh murabbiyi Midori Honda futzalchilarimizni samimiy tabriklab, jamoa oldida qilinadigan ishlar ko‘pligini, fevral boshidayoq terma jamoa yig‘inlarga kirishini va yuqori marralar yo’lida birgalikda harakat qilish kerakligini aytib o‘tdi.

Futzal terma jamoamizning keyingi musobaqalarda yanada yuqori natijalar qayd etishlariga ishonch bildirildi. O‘z navbatida, murabbiylar shtabi so‘nggi yillardagi ayollar futboliga berilayotgan e’tibor ortganini e’tirof etdi. Jamoa nomidan musobaqa to‘purari Maftuna Shoyimova O‘FAga e’tibor uchun minnatdorchilik bildirdi. Tadbir yakunida futzalchilar pul mukofotlari bilan taqdirlandilar.