Avval xabar berganimizdek, yurtimizda ayollar futbolini yangi bosqichga olib chiqish va uni yanada rivojlantirish maqsadida O‘FA tomonidan O‘zbekiston ayollar terma jamoasining bosh murabbiyligiga yaponiyalik tajribali mutaxassis Midori Honda jalb etildi.

Midori Honda va uning yordamchisi Takaya Susumi Turizm va sport vazirligida bo‘lishdi. Uchrashuvda Turizm va sport vaziri Aziz Abduxakimov va O‘FA birinchi vise-prezidenti Ravshan Ermatov ishtirok etdi.

Uchrashuv avvalida Aziz Abduhakimov Yaponiyaning ayollar futbolida erishayotgan yutuqlarini alohida e’tirof etdi. Shuningdek ularga bugungi kunda yurtimizda ayollar sporti, xususan, futbolga berilayotgan e’tibor haqida ma’lumot berildi.

Yaponiyalik mutaxassislar yordamida mamlakatimizda ayollar futboliga tartib va mehnasevarlik kabi yapon xalqiga xos xarakterni shakllantirish kerakligi aytildi. Jamoamizning oldiga katta maqsadlar qo‘yilgani, bu yo’lida barcha sharoitlar taqdim etilishi ta’kidlandi.

Shuningdek, uchrashuvda yaponiyalik murabbiylar bilan ayollar jamoamizni rivojlantirishga oid keyingi rejalar muhokama qilindi.