Yangi mavsumga Toshkent viloyatining Ahmad Yassaviy nomidagi stadionida tayyorgarlik ko‘rayotgan “Metallurg”ning bugungi mashg‘ulotlari darvozabon Akmal Ortiqovni tavallud kuni bilan qutlashdan boshlandi. Shundan so‘ng murabbiylar shtabi odatdagidek futbolchilarning jismoniy holatini tiklash mashqlariga ko‘proq urg‘u qaratishdi.
Bekobodliklar Toshkentda tayyorgarlikni yana ikki kun davom ettirishadi. Shundan keyin jamoa a’zolari uchinchi bosqichni o‘tash uchun xorijga – Turkiyaning Antaliya shahriga yo‘l oladi. “Metallurg” xorijda to‘rtta nazorat uchrashuvini o‘tkazishni rejalashtirgan.
Hozircha sparring raqiblardan ikkitasi ma’lum. Bular Ukrainaning “Metallist” hamda Armanistonning “Alishkert” jamoalaridir. Yana ikkita raqib bilan dastlabki kelishuv bor, ammo uzil kesil bir to‘xtamga kelinmagan. Shu sabab qolgan uchrashuvlardagi raqiblar haqida keyinroq qo‘shimcha ma’lumot beramiz.
Eslatib o‘tamiz, Luisma Ernandes yetakchiligidagi “Metallurg” Turkiya safariga 3 fevral sanasida uchib ketadi.
