Bugun Turizm va sport vazirligida mamlakatimizda shaxmat sportini yana-da ommalashtirish va rivojlantirish, shaxmat maktablari faoliyatini kuchaytirish va xalqaro grossmeysterlar safini oshirish hamda shaxmatni yurtimizda eng ommaviy sport turiga aylantirishga qaratilgan ochiq muloqot bo‘lib o‘tdi. Uni O‘zbekiston Respublikasi Bosh vaziri o‘rinbosari, mamlakat shaxmat federasiyasi raisi Aziz Abduhakimov olib bordi.

Ochiq muloqotda shaxmat trenerlari, yetakchi grossmeysterlar va ularning ota-onalari hamda ommaviy axborot vositalari xodimlari ishtirok etdi.

Unda O‘zbekiston 2026 yilgi Butunjahon shaxmat Olimpiadasi mezbonligi uchun da’vogarlar safiga kirganligi ma’lum qilindi. Raqiblar ham anoyilardan emas, shaxmat vatani sifatida e’tirof etiladigan Hindiston va dunyoga bir qator nomdor shaxmatchilarni yetishtirib bergan Vengriya davlatlaridir.

Turizm va sport vaziri Aziz Abduxakimovning ta’kidlashicha, ushbu nufuzli musobaqa ko‘hna va navqiron Samarqand shahrida tashkil etilishi rejalashtirilmoqda.