Бугун Туризм ва спорт вазирлигида мамлакатимизда шахмат спортини яна-да оммалаштириш ва ривожлантириш, шахмат мактаблари фаолиятини кучайтириш ва халқаро гроссмейстерлар сафини ошириш ҳамда шахматни юртимизда энг оммавий спорт турига айлантиришга қаратилган очиқ мулоқот бўлиб ўтди. Уни Ўзбекистон Республикаси Бош вазири ўринбосари, мамлакат шахмат федерацияси раиси Азиз Абдуҳакимов олиб борди.

Очиқ мулоқотда шахмат тренерлари, етакчи гроссмейстерлар ва уларнинг ота-оналари ҳамда оммавий ахборот воситалари ходимлари иштирок этди.

Унда Ўзбекистон 2026 йилги Бутунжаҳон шахмат Олимпиадаси мезбонлиги учун даъвогарлар сафига кирганлиги маълум қилинди. Рақиблар ҳам анойилардан эмас, шахмат ватани сифатида эътироф этиладиган Ҳиндистон ва дунёга бир қатор номдор шахматчиларни етиштириб берган Венгрия давлатларидир.

Туризм ва спорт вазири Азиз Абдухакимовнинг таъкидлашича, ушбу нуфузли мусобақа кўҳна ва навқирон Самарқанд шаҳрида ташкил этилиши режалаштирилмоқда.