Shabad bolaligidan Football Manager o‘yiniga qattiq qiziqadi. U ota-onasining bir haftaga uydan safarga chiqqanini butun hayotidagi eng yaxshi davr sifatida tilga oladi. Zero, bu Shabad uchun bir necha kun o‘yin ichiga to‘la «g‘arq» bo‘lish imkoniyati edi. Eng muhimi, u shunchaki, havas uchun o‘ynagani yo‘q, balki murabbiylik san’atini ham o‘rgandi. Xususan, 11-sinfda o‘qiyotganida maktab jamoasini mustaqil boshqardi. Shabad shu bilan to‘xtab qolmay, keyinchalik o‘z jamoasini ham shakllantirdi.
Havaskor murabbiy shuning barobarida qalin daftar tutib, unga har bir futbolchining o‘ziga xos jihatlarini yozib bordi. Yakunda Shabad o‘sha tahlillarini «Uigan»ning sobiq menejeri Roberto Martinesga ko‘rsatdi. To‘g‘ri, ispaniyalik mutaxassis yigitni darhol o‘z shtabiga kiritgani yo‘q. U shunda murabbiyga «Uigan»ning APLdagi barcha raqiblari haqida to‘plagan ma’lumot-hisobotini topshirdi. Shuningdek, o‘sha vaqt Xosep Gvardiola boshqargan «Barselona»ni qanday yengish mumkinligi haqida turli ko‘rsatmalar jadvalini tuzdi. Roberto Martines shundan keyingina yigitning salohiyatiga tan berib, uni o‘z shtabiga qo‘shib oldi. Natijada Shabab keyingi 2 yil davomida Robertoni alohida tahliliy hisobotlar bilan ta’minlab keldi.
Asosiy fakt: Shabad o‘shandan buyon Roberto Martinesning doimiy hamrohi. Ya’ni ispaniyalik murabbiy qaysi jamoada ishlamasin, FM ixlosmandini o‘z yoniga chorlaydi. Xullas, Shabad avvaliga «Everton» klubi, keyin Belgiya milliy jamoasida Marnites bilan yonma-yon ishladi. Yaqinda esa mustaqil ravishda murabbiylik faoliyatini boshladi. Aniqroq aytsak, o‘tgan yilning noyabr oyida Shotlandiya klubi boshqaruvini qo‘lga oldi va endi yarimprofessional maqomidagi jamoani shug‘ullantirmoqda.
O.ATABOYEV tayyorladi
