Angliyaning «Manchester Yunayted» klubi yaqinda jinsiy zo‘ravonlik va o‘lim bilan tahdid qilishda ayblangan Meyson Grinvudning muxlislar tomonidan sotib olingan futbolkalarini qaytarib olishi haqida xabarlar tarqalgan edi.

So‘nggi ma’lumotlarga ko‘ra, MYU ushbu futbolchining ismi tushirilgan va 3 yil avval sotilgan liboslarni ham tekinga, boshqa futbolchining ismi tushirilgan futbolkaga almashtirib bermoqda.

Bu haqda klub rasmiy saytida shunday deyiladi: «Manchester Yunaytedning Grinvud nomi tushirilgan futbolkalarini sotib olgan «United direct» hamda «Adidas» kompaniyalari mijozlari ularni qo‘shimcha to‘lovlarsiz, boshqa o‘yinchi nomi tushirilgan jamoaning bu mavsumdagi uy libosiga almashtirish imkoniyatiga egalar. Libos eskiligi muhim emas, biz ushbu tipdagi har qanday futbolkani almashtirib beramiz».

Eslatib o‘tamiz, 20 yoshli Grinvud jinsiy zo‘ravonlik va o‘lim bilan tahdid qilishda gumonlanib hibsga olingan edi. Bir necha kundan so‘ng, angliyalik futbolchi garov evaziga qo‘yib yuborildi. Ammo shunga qaramay, MYU uni mashg‘ulotlardan chetlatgan.