Angliyaning "Manchester Siti" klubi bosh murabbiyi Xosep Gvardiola yanvar oyida sotib olingan Xulio Alvares haqida fikr bildirdi. Argentinalik yosh hujumchi yana olti oyni ijara asosida «River Pleyt»da o‘tkazadi. Sababi oddiy – «shaharliklar» tarkibida hujumkor pozisiyalarda juda ko‘p futbolchilar bor.

«Nafaqat bugun, balki kelajak uchun ham ishlagan «Manchester Siti»ni tabriklayman. Bu hozir jamoamizga o‘tishi mumkin bo‘lgan futbolchi, ammo ayni damda u o‘ynaydigan pozisiyada ko‘plab futbolchilar bor. Men tarkibda futbolchilar xaddan tashqari juda ko‘p bo‘lishini xohlamayman. Unga ijarada qolgani ma’qul. Gallyardo bilan so‘nggi yillarda o‘zini yaxshi ko‘rsatgan «River»da o‘ynab tursin. Keyingi mavsumdan boshlab u biz bilan bo‘ladi, keyin Alvaresdan qanday foydalanishimizni hal qilamiz. Kelgusi bir necha yil ichida bunday iqtidorga ega bo‘lganimizdan xursandmiz», - dedi Gvardiola.