Bu yangilik Lionel Messining muxlislarini ham xursand qilishi, ham hafsalasini pir qilishi mumkin: u Liga 1'da 7-assistentlikni amalga oshirdi, biroq Fransiya chempionatida 14 uchrashuvda atigi 2 ta gol urdi.
“Renn”ga qarshi o‘yinda argentinalik futbolchi qo‘shib berilgan vaqtda Kilian Mbappega golli pas berdi va u parijliklarga 3 ochko keltirdi. Leoda assistentlik bilan bog‘liq muammolar yo‘q. Lekin nega Messi yangi jamoada juda kam gol uryapti?
Agar Messining “PSJ”dagi to‘liq statistikasiga nazar tashlasak, mayestro baribir sezilarli foyda keltirishini tushunamiz. Parijga o‘tganiga 6 oy bo‘ldi, Leo 20ta o‘yinda 7+7 natijani qayt etdi, ya’ni barcha musobaqalarda "PSJ"ning 14ta golida bevosita ishtirok etdi. Ha, Messi Chempionlar ligasida tez-tez gol urdi (5ta gol), uning chempionatdagi gollari statistikasi esa muxlislarni xavotirga solmoqda.
Taqqoslash uchun, o‘tgan mavsum Messi La Ligada 14 turda 7 ta gol urgandi. Balki, Pochettino muntazam ravishda jamoadagi o‘rnini o‘zgartirib turgani uchun hali super to‘purar qaytmagandir. Endi u o‘ng qanot yarim himoyachisi, hujumchi ortidagi futbolchi yoki markaziy hujumchi sifatida maydonga tushyapti. "Lill" (5:1) va "Renn" (1:0) bilan o‘yinlarda u markaziy hujumchi sifatida o‘ynadi. Shu bilan birga, Messi maydonda o‘ziga qulay pozisiya qidirayotgani aniq: u orqaroqdan harakat qilganda ham imkon qadar samarali bo‘ladi, uning oldida hujum g‘oyasini ishlab chiqish uchun bo‘sh joy va sheriklar mavjud.
Bu, ayniqsa, Mbappe uchun ayni muddao bo‘ladi. O‘tgan hafta “Lill” bilan o‘yinda Messi o‘yindagi barcha ishtirokchilar orasida eng yuqori ball 7 ball oldi. Umuman olganda, “PSJ” taniqli nomlar bilan kuchli, deyarli barcha futbolchilar vaziyatni o‘zi hal qilmoqchi bo‘ladi.
Eslatib o‘tamiz, yaqinda Messi jarohatlar, koronavirus va Argentina terma jamoasidagi o‘yinlar tufayli klubdan biroz chalg‘igan edi. Endi Lionel asta-sekin optimal formaga kiryotganga o‘xshaydi.
“Leo - daho. Bunday futbolchilar 100 yilda bir marta tug‘iladi. U yangi jamoaga o‘tganidan keyingi moslashish jarayonini boshdan kechirdi. U tashqi omillar bilan unchalik omadli emas edi, lekin u buni xotirjamlik bilan yengdi.
Endi Messi uchun eng yaxshi daqiqalar keldi. Leo mavsumning hal qiluvchi bosqichiga yaxshiroq formada yaqinlashmoqda”, - deya Pochettinoning so‘zlarini keltiradi Cadena Cer.
Aytgancha, “Renn” bilan o‘yin uchun Messi kamtarona 4 ball oldi, garchi u uzatmani rasmiylashtirib, sheriklari uchun yana bir qancha qulay imkoniyatlar yaratib bergandi. Dunyoning eng yaxshi o‘yinchilaridan biridan ko‘proq narsa kutilishi aniq. Ammo argentinalik futbolchining gol statistikasiga ta’sir qiladigan yana bir muhim jihat bor. Messi Fransiya chempionatida 7 marta darvoza ustuni va to‘sinini nishonga oldi. Bu Yevropaning top-5 ligalaridagi “eng yaxshi” ko‘rsatkich.
Maurisio Pochettino bir oyni o‘tkazib yuborgan Messini maqtashdan to‘xtamaydi. Parijga moslashish jarayonida boshidan kechirgan barcha qiyinchiliklardan keyin hamma o‘zgarishni xohlaydi. Biroq seshanba kuni Leo va “PSJ”ni eng qiyin narsa kutmoqda, Chempionlar ligasiga qaytish va "Real"ga qarshi o‘yin. Agar Messi parijliklarni chorak finalga olib chiqsa, unga nisbatan bildirilayotgan tanqidlar biroz kamayadi va shu bilan birga bosh murabbiyga bildirilayotgan negativ fikrlarni bir muddatga yo‘q chiqaradi.
