Turkiya yig‘inidagi uchinchi nazorat bahsida "sherlar" Gruziyaning "Dinamo" klubi bilan maydonga tushdi.

Bellashuv har ikki jamoaning hujumkor va tomoshabop o‘yini bilan kechdi. Dastlab ustunlik qilgan gruziyaliklar 15-daqiqada hisobni ochishdi. Qanotdan jarima maydoniga kirib borgan Bilenki o‘tkir burchakdan to‘pni darvozaning uzoq burchagiga yerlatib aniq yo‘lladi. Birinchi bo‘limning qolgan vaqti mobaynida ustunlik "Sherlar" tarafida bo‘ldi. Temirov deyarli bo‘sh qolgan darvozani ishg‘ol qila olmagan bo‘lsa, keyinroq Turg‘unboyevning boshi bilan bergan zarbasi darvoza yonginasidan o‘tib ketdi.

Ikkinchi bo‘limni hujumkor boshlagan "Paxtakor" juda qulay vaziyatlardan foydalana olmadi. Dastlab Cheranning aniq zarbasidan so‘ng darvozabon mahorat ko‘rsatdi. 56-daqiqada Temirovning urinishidan keyin to‘p ustunga tegib qaytdi. "Dinamo"ning javob hujumi gol bilan tugadi. Tezkor hujumni Mekvabishvili samarali yakunladi. Bir holatda raqib posboni mahorat ko‘rsatdi. U bir necha soniya ichida Sayfiyev va Cheranning aniq zarbalari yo‘liga g‘ov bo‘ldi. 73-daqiqada qarshi hujumdan so‘ng Mali hisobni yiriklashtirdi. O‘yin yakunigacha Larinning zarbasi yodda qoldi. Bu vaziyatda ham to‘p darvoza chizig‘idan qaytarildi.

Navbatdagi nazorat bahsi 19 fevral kuni Kiyevning "Dinamo" jamoasiga qarshi bo‘lib o‘tadi.

"PAXTAKOR" - "DINAMO" TBILISI - 0:3 (0:1)

"Paxtakor": Quvvatov (Isaqov, 78), Alijonov (Ergashboyev, 83), Xadjiyev (Larin, 65), A’zamov (Yoqubov, 90), Sayfiyev (Roziyev, 71), Sobirxo‘jayev (Hamrobekov, 46), Aliboyev (Fayzullayev, 75), Cheran (Sharkich, 65), Rashidov (Erkinov, 59), Turg‘unboyev (Xolmatov, 59), Temirov (Mirahmadov, 59).

Gollar: Bilenki, 15 - 0:1. Mekvabishvili, 57 - 0:2. Mali, 73 - 0:3.