«Yuventus» klubi hujumchi Paulo Dibala bilan shartnomani uzaytirish borasida yangi muzokara boshladi.

Turinliklar futbolchi bilan ilk muzokarani kuzda boshlagan bo‘lib, o‘shanda klub argentinalik futbolchiga 8 million yevro va turli bonuslar taklif etgandi. Ammo "Yuve" keyinchalik ushbu taklifiga o‘zgartirish kiritib, maoshlar borasida taklifni pasaytirdi. Bu esa Pauloga yoqmagani sabab muzokara bosh berk ko‘chaga kirib qoldi.

«Yuventus» Dibalaga yana avvalgi taklifni berdi, ammo klub futbolchining agenti Xorxe Antun o‘z ulushining katta qismidan voz kechishini istamoqda. Bu haqda "Football Italia" xabar tarqatdi. Ma’lumot o‘rnida: Argeninalik futbolchi hozirda yiliga 7,5 million yevro maosh olmoqda.

Paulo Dibala joriy mavsumda «Yuventus» safida barcha musobaqalar doirasida 27ta o‘yinda ishtirok etib, 12ta gol va 6ta assist muallifiga aylandi. Uning klub bilan amaldagi shartnomasi joriy mavsum so‘ngida yakuniga yetadi. Agar yangi shartnoma imzolanmasa, u erkin agent sifatida "keksa sinyora" bilan xayrlashadi.