Xabaringiz bor, joriy yilning 27 fevral sanasida Yaypan shahridagi «O‘zbekiston» o‘yingohida O‘zbekiston Supekubogi uchrashuvi o‘tkaziladi. Shu kuni O‘zbekistoning eng nomdor jamoalaridan hisoblangan Toshkentning «Paxtakor» va Qarshining «Nasaf» klublari o‘zaro maydonga chiqadilar.

Ayni kunlarda Yaypan shahrida ushbu katta futbol bayramiga tayyorgarlik jarayoni o‘zining avj pallasiga kirgan. «Turon» futbol klubi O‘zPFL bilan xamkorlikda Superkubok uchrashuvini ko‘tarinki va bayramona ruhda o‘tkazish maqsadida «O‘zbekiston» o‘yingohi xududida bir qator amaliy ishlar olib borilmoqda.

Shuningdek, «Paxtakor» va «Nasaf» jamoalari o‘rtasidagi O‘zbekiston Superkubogi uchrashuviga kirish chiptalari sotuvi ham yo‘lga qo‘yilgan bo‘lib, stadion mas’ullari tomonidan berilgan bugungi ma’lumotga ko‘ra ayni damda xarid qilingan chiptalar soni 3000dan ziyodroqni tashkil etmoqda.

Ta’kidlash joiz, 2022 yilgi katta futbol mavsumi Yaypanda O‘zbekiston Superkubogi uchrashuvi bilan start oladi. O‘yindan bir kun avval «O‘zbekiston» stadioni anjumanlar zalida «Paxtakor» va «Nasaf» klublari bosh murabbiylari ishtirokida matbuot anjumani tashkil etiladi. Bundan tashqari, futbol uchrashuvi boshlanishi oldidan va tanaffus vaqtida muxlislar uchun maxsus konsert dasturi namoyishi ham rejalashtirilgan. Jumladan, shu kuni stadionga tashrif buyurgan muxlislar taniqli estrada yulduzlari - Farhod va Shirin juftligi ijrosida diltortar taronalarga bevosita guvoh bo‘lgan xolda maroqli hordiq chiqarishlari ta’minlanadi.

«Turon» matbuot xizmati