Shamil Gazizov «Spartak» nima uchun yarim himoyachi Oston O‘runov bilan shartnoma imzolaganini tushuntirdi. Uning so‘zlariga ko‘ra, bu Leonid Fedunning tashabbusi bo‘lgan. O‘runov bo‘yicha muzokaralar nihoyatda qiyin kechdi.
«Fedun shaxsan uni jamoaga taklif qilishimizni xohlagan edi. «Ufa»da ishlagan paytimda u mendan «Qaysi futbolchi sen bilan borishi mumkin?», - deb so‘radi. Men besh kishi nomini aytdim: Belenov, Fomin, Nedelcharu, Tabidze va O‘runov. Fedun shunday dedi: «Menga ro‘yxatdan eng ko‘p O‘runov yoqdi».
Muzokaralar qiyin kechdi. Uni «Spartak»dan tashqari SSKA va «Rubin» ham sotib olmoqchi edi. O‘zbekistonda uni boshqa klubga o‘tishi uchun oilasiga bosim bo‘lgan. U yerda shunday odamlar borki, Ostonning oilasiga turli tazyiq o‘tkazgan. Shu bois, uning agenti: «O‘runov bizdan boshqa klubga o‘tishni so‘rashmoqda», - dedi. Keyin men shaxsan o‘zim Leonid Arnoldovichdan O‘zbekistondagi ba’zi odamlar bilan gaplashib, Ostonning oilani tinch qo‘yishni iltimos qildim», — dedi Gazizov.
