Angliyaning "Tottenxem" jamoasi bosh murabbiyi Antonio Konte APLning 27-turida «Lids» (4:0) jamoasi ustidan qo‘lga kiritilgan g‘alaba haqida fikr bildirdi.

“Men o‘yinning har bir vaziyatida ishtiyoq va kurashish istagini ko‘rdim. Futbolchilar butun o‘yin davomida kurashishdi va buni ko‘rib xursand bo‘ldim.

Bu g‘alaba bizning boshlang‘ich nuqtamiz bo‘lishi kerak. Agar biz nimanidir da’vo qilib, nimadir qurmoqchi bo‘lsak, futbol o‘ynash va undan zavqlanishning o‘zi yetarli emas, biz g‘alaba qozonishimiz kerak. G‘alaba qozonish uchun esa sifatli o‘yinni ishtiyoq bilan uyg‘unlashtirish kerak.

Raqib maydonga shunchaki o‘yin-kulgi uchun emas, balki ochko olish uchun tushganimizni tushunishi kerak.

Mening buyruqlarim «yumshoq» emas. Mening jamoalarim kuchli bo‘lishi kerak. Men bu yerga nafaqat futboldan zavq olish uchun kelganman, balki bu klub uchun muhim shaxsga aylanishni xohlayman. Men nimadir uchun kurashishimizni xohlayman. Bu atrofdagilarga tushunarli bo‘lishini istayman”, - dedi Konte.