Superliganing 2-turidan o‘rin olgan "Nasaf" - "Metallurg" (1:1) uchrashuvidan keyin mezmonlar bosh murabbiyi Ro‘ziqul Berdiyev matbuot anjumanida ishtirok etdi.
- O‘yin haqida
- O‘yin ancha asabiy tarzda kechdi. "Metallurg" ko‘proq himoyaga e’tibor qaratib o‘ynashini bilardik. Ular qarshi hujumlar va standart vaziyatlarga tayanib o‘ynashdi.
Oxirgi pallada diqqat-e’tiborimizni yo‘qotdik va bu uchun jazolandik. Birinchi taymga nisbatan ikkinchi taymda ko‘proq vaziyatlar yaratdik. Vaziyatlardan faqat bittasini golga aylantirdik. O‘ylaymanki, raqibdan yaxshiroq o‘ynadik, ammo natija biz va muxlislar kutgandek bo‘lmadi. Tayyor g‘alabani qo‘ldan boy berdik. Shunday bo‘lsa-da, yigitlarga hech qanday e’tiroz yo‘q. Ular borini berib o‘ynashdi.
- Mehmon jamoa ustozi xorijlik. Uning o‘yin uslubiga qanday baho berasiz?
- Bugun “Metallurg” asosan himoyalandi va uzun paslar bilan o‘ynadi. AGMKga qarshi bellashuvda ham qarshi hujumda o‘ynagandi. Ehtimol bu ispan murabbiyining tanlagan va yoqtirgan uslubidir. "Metallurg" futbolchilari ko‘p vaziyatlarda vaqtni cho‘zishga harakat qilishdi, bu esa muxlislarimizga yoqmadi. Albatta, mehmonlarning tanlagan va qo‘llagan taktikasi o‘zlariga qo‘l keldi.
- O‘tkazib yuborilgan golda raqib futbolchisi yolg‘iz qoldirildi. Bu himoyachilarning aybimidi?
- Umumiy qilib olsak, ko‘pchilikning xatosi bo‘ldi. E’tiborni yo‘qotmaslik kerak edi. "Metallurg" kombinasion standart vaziyatlarga urg‘u berishini bilardik. O‘sha vaziyatda yosh o‘yinchimiz Akramov diqqat-e’tiborni yo‘qotib, xato qildi. Gol bo‘lgan vaziyatda Umid Ergashevni xatosi bormidi deb o‘ylagandim, ammo keyin bilsam, to‘p Husniddin Aliqulovga tegib, rikoshet orqali darvozaga kirib ketgan ekan.
- G‘olib G‘aybullayev qaydnomadan joy olmadi...
- G‘olib "Navbahor" bilan bahsda kichik jarohat olgandi. Shu bois u qaydnomaga kiritilmadi.
- Oldinda "Nasaf"ni OCHL pley-offi doirasidagi "Baniyas"ga qarshi muhim o‘yin kutmoqda. Jamoa oxirgi 3 o‘yinda g‘alaba qozona olmagani futbolchilarga salbiy ta’sir ko‘rsatmaydimi?
- Albatta, bu borada ishlaymiz. Natijalar ta’sir qiladi, albatta. Biroq bu kabi holatlarga oldin ham duch kelganmiz. O‘ylaymanki, yigitlarni ruhiy holatini yaxshilaymiz.
- Bizdagi ma’lumotlarga ko‘ra, "Nasaf"ga O‘zbekiston Kubogi mukofot puli va dekabr oyi maoshi berilmagani aytilmoqda. Bu qanchalik asosli?
- Bu narsa rost. Yo‘q desam noto‘g‘ri bo‘ladi. O‘ylaymanki, bu qarzdorliklar ta’sir ko‘rsatgani yo‘q. Rahbariyat tez orada bu masalani ijobiy hal etadi.
