Angliya futbolida yana bir tur ortda qoldi. Biz muxlislar har haftada futbol jozibasi va ajoyib gollardan zavq olish imkoniyatiga ega bo‘lamiz. APL o‘z uslubida – jamoaviy gollardan tortib, futbolchilar individual mahoratining eng yuqori darajalarini namoyon qila oladi. Bugun esa o‘sha, biz aytayotgan gollar shodasidan eng yaxshilari sanab o‘tiladi (28-tur).
1. Xarvi Barns («Lids»ga qarshi)
Umuman olganda, «Lids» o‘tgan turni yomon o‘tkazmagan edi. Jessi Marsh o‘zining boshqaruvini bunday boshlanishini kutmagani aniq, albatta. Afsuski, «Lester» ushbu to‘qnashuvda o‘ziga kerakli ochkoni sug‘urib oldi. Uchrashuvdagi yagona golga esa Xarvi Barns mualliflik qilgan edi. Ushbu golda zaxiradan tushgan Kelechi Ixeanachoning xizmatlari katta bo‘ldi.
2. Olli Uotkinz («Sautgempton»ga qarshi)
«Aston Villa» bir qadar o‘yini o‘nglangan «Sautgempton»ni sharmandali mag‘lubiyatga uchrata oldi. Hisob esa 4-0 bilan mezbonlar foydasiga hal bo‘ladi. «Villa Park»dagi ilk golga Uotkinz mualliflik qilgan edi. Hammasi bir zumda yuz berdi: Uotkins birinchi teginishdayoq hammasini hal qiladi. «Aston Villa»ning Twitter sahifasi ushbu golga «harakatdagi nazm» deb ta’rif bergandi.
3. «Arsenal» va «Uotford» o‘yinidagi har 5 ta gol
Ha, biz doim ham bunday o‘yin hamda gollarni ko‘ravermaymiz. Chunki jamoalarning mentaliteti turlicha bo‘ladi. Ammo ushbu bahsda har ikki tomon imkon boricha g‘alabaga harakat qildi «Vikarij Roud»da kiritilgan har 5 ta gol ham «sehrli» edi. Agar ushbu gollar ichidan eng yaxshisini tanlash kerak bo‘lsa, u holda Kucho Ernandesning qaychi uslubidagi zarbasini keltiramiz. Shunchaki, mukammal!
4. Jeydon Sancho («Manchester Siti»ga qarshi)
«MYU» muxlislari mag‘lubiyatdan xafaligini bilamiz. Ammo ularning seviklilari urgan gol o‘ta ajoyib edi. Gol qarshi hujumdan hosil qilindi. Nuqtani esa Sancho ustamonlik bilan yasadi. Uning golini nishonlashida ham urgandagi kabi sovuqqonlik aks etgandi.
5. Harri Keyn («Everton»ga qarshi)
«Everton» 28-turdan o‘rin olgan o‘z uyidagi bahsda «Tottenxem»ga chora qo‘llay bilmadi. «Shporlar» o‘sha kecha javobsiz naq 5 ta gol urishni udda qilishdi. Ular ichida Keynning ikkinchi goli eng chiroylisi sifatida e’tirof etiladi. Mett Doertining krossini Keyn to‘xtatmasdan, chap oyoqda, darvozaning pastki burchagiga joylaydi. Bu esa o‘yinga qo‘yilgan mantiqiy yakun edi. Ha, o‘shanda biz muxlislar ushbu goldan zavq olgandik. Ammo Frenk Lempardni bunday qilgan deya olmaymiz...
ISMATOV J.
