«Real» va «Milan»ning mashhur sobiq yarim himoyachisi Klarens Zeedorfning fikricha, Mbappening o‘yin uslubi Madrid jamoasiga to‘g‘ri kelmaydi.

«PSJ»ning 23 yoshli hujumchisi yangi mavsum boshidan «Real»ga o‘tishi mumkinligi haqida ko‘plab OAVlar xabar bermoqda.

«Men uni «Real»da ko‘rmayapman. Agar uni chap qanotga qo‘yishsa, Vinisiusni qurbon qilish kerak bo‘ladi. Mbappeni o‘ng tomonga o‘ynatasizmi? Balkim. Lekin kechagi Benzema qanday o‘ynaganiga qarang: uning yordami jamoa uchun zarurligini tushundi va o‘yinni raqib jarima maydonchasi tomonga ko‘chirdi. Mbappe yo‘q. Balki Kilianga rivojlanish uchun boshqa muhit kerakdir, ammo bu «Real» deb o‘ylamayman», - deydi gollandiyalik sobiq futbolchi.

Kecha bo‘lib o‘tgan Chempionlar ligasi doirasidagi «Real» - «PSJ» uchrashuvi ispanlarning g‘alabasi (3:1) bilan yakunlandi. Mbappe jamoasining yagona goliga mualliflik qildi, ammo «qaymoqranglilar» 1/4 finalga yo‘l oldi.