Superliga 2-turidan o‘rin olgan “Surxon” – “Navbahor” (1:2) uchrashuvidan keyin dastlab “lochinlar” ustozi Samvel Babayan o‘yin haqidagi fikrlarini bildirdi.

- Raqibni yaxshi o‘rgangandik, bugungidek kurash bo‘lishini bilardik. Shunga ko‘ra tayyorlangandik, o‘ylashimcha, rejamiz ish berdi. Garchi uchrashuv 2:1 hisobida yakunlangan bo‘lsada, biz ko‘plab imkoniyatlar yaratdik va o‘yin taqdirini ancha avvalroq hal qilishimiz ham mumkin edi. Ushbu g‘alabani muxlislarimizga bag‘ishlaymiz. Shuni alohida ta’kidlashim kerakki, mavsum-2022da murabbiylar shtabi, futbolchilar ishqibozlarni xursand qilish uchun bahsning dastlabki daqiqasidan oxirigacha astoydil kurashadilar. Bu yil o‘tkinchi o‘yinlar bo‘lmaydi, chempionat qiziqarli kechishini avval ham aytgandim. Har bir g‘alabaning qiymati o‘ta yuqori bo‘ladi. Biz tanlagan yo‘limizdan olg‘a borib, ochkolar ishlashda davom etamiz, - dedi Samvel Vyacheslavovich.

- “Navbahor”ning bugungi tarkibini joriy mavsum uchun asosiy tarkib desak bo‘ladimi?

- Ixtiyorimizda juda ko‘plab futbolchilar guruhi bor, ularning barchasi asosiy tarkib a’zolari. Keyinchalik vaziyatga qarab rotasiya qilishimiz mumkin. Bugun shunday tarkib tuzishimizga to‘g‘ri keldi, keyingi uchrashuvlarda ro‘yxat boshqa ko‘rinish olishini istisno qilmayman. Muhimi, bizda maydonga tushib, “Navbahor” sharafini munosib himoya qila oladigan futbolchilar yetarli.