Bugun pro liganing 2-turida “Andijon” klubi o‘z uyida “Yangiyer-Quruvchi”ni qabul qilib 2:0 hisobida g‘alaba qozondi.

Uchrashuvdan keyin odatdagidek matbuot anjumani tashkil etildi. Uning birinchi qismida mehmonlar bosh murabbiyi Bekzod Qodirqulov ishtirok etdi.

- Kurashlarga boy o‘yin bo‘ldi, bu oldindan ma’lum edi. Ob-havo noqulay keldi, ammo buni bahona qilib bo‘lmaydi. O‘zimizni xatolarimiz tufayli mag‘lubiyatga uchradik. Buning uchun muxlislarimizdan uzr so‘raymiz. “Andijon” jamoasini g‘alaba bilan tabriklayman. Ko‘proq kurashlarga boy o‘yin bo‘ldi. Mazmunli, sifatli o‘yin bo‘lmadi, deb o‘ylayman, - dedi Qodirqulov.

- Jamoa oldiga qo‘yilgan asosiy vazifa qanday?

- Asosiy vazifa har bir o‘yinda g‘alaba qozonish. Xoh uyda, xoh safarda bo‘lsin yutmoqchimiz.

- Superligaga chiqish maqsadi bormi?

- Oliy maqsad har doim bor. Maqsad bo‘lmasa, hayot ham bo‘lmaydi. Superligaga chiqishni niyat qilganmiz.

- Ikkinchi bo‘limda Siroj Meliyevni orqaroqqa olinishiga sabab nima?

- Hujumkor yarim himoyachi – Jahongir Abdusalomovni maydonga tushirdik. Orqaga olinmadi. Bizga hujum bo‘lganida orqaroqqa o‘tib yordam berishiga ko‘rsatma bergandik.

- Tajribali himoyachi Abduqahhor Hojiakbarov nima uchun asosiy tarkibda maydonga tushmayapti?

- Uni jarohati bor. Jamoamizga qo‘shilganida jarohati bor edi. Asta-sekin tiklanyapti va optimal formaga kirib boryapti. Albatta, bizga yordam beradi. Tajribasiga shubha yo‘q.

- Bugun maydonda “Andijon” jamoasining o‘yini sizga qanday ko‘rindi?

- Raqib haqida biror-bir fikr bildira olmayman. O‘z klubim haqida gapiradigan bo‘lsam, ikkinchi bo‘limda ko‘proq hujumda faol bo‘ldik. Aynan hujumchilarimiz yaxshiroq o‘ynashni boshlashgach, imkoniyatlar paydo bo‘ldi. Xuddi shu narsani birinchi taymda ham bajarishimiz kerak edi. Ko‘rsatma shunday edi. “Andijon” haqida esa gapira olmayman. Chunki o‘z jamoamdagi muammolar o‘zimizga yetarli.