«Manchester Yunayted» yangi stadion qurish uchun o‘z arenasini buzishi mumkin. Klub xo‘jayinlari o‘yingohni qayta ta’mirlash uchun ushbu variantni ham ko‘rib chiqmoqda.

The Telegraph’ning xabar qilishicha, mankunianliklar tez orada ta’mirlash ishlariga mas’ul bo‘ladigan kompaniyani tanlaydi.

Stadionni ta’mirlash uchun ko‘rib chiqilayotgan variantlardan biri — 1910 yilda qurilgan, 74 ming tomoshabin sig‘imiga ega «Old Trafford»ni to‘liq buzib tashlash bo‘lib turibdi. Uning o‘rnida «Manchester Yunayted» 90 ming tomoshabin sig‘adigan yangi stadion qurmoqchi. Undan tashqari maydon atrofida ayollar futboli va akademiya uchun kichik stadionlar ham bo‘ladi.

Manchesterliklar bir vaqtning o‘zida ta’mirlash uchun boshqa variantlarni ham ko‘rib chiqmoqda. Ular orasida janubiy tribunani kengaytirish va stadion sig‘imini 80 ming tomoshabinga yetkazish yoki hech qanday buzishlarsiz arenani ta’mirlash variantlari mavjud.

Ma’lumot uchun, «Old Trafford» 1910 yildan buyon «Manchester Yunayted»ning uy stadioni hisoblanadi. Faqatgina Ikkinchi jahon urushida bombardimon qilinganligi sababli 1941—1949 yillarda mankunianliklar u yerda o‘yin o‘tkazmagan. Bu vaqt davomida «qizil iblislar» «Manchester Siti»ga qarashli «Meyn Roud» stadionidan foydalanishga majbur bo‘lgan.