"Bavariya" hujumchisi Robert Levandovski bugungi mashg‘ulotni muddatidan avval tugatishga majbur bo‘ldi, deb xabar beradi Sky Germany.

Manba bergan xabarga ko‘ra, 33 yoshli polyalik darvoza tomon zarbalar berish mashqi paytida sirpanib ketgan, shundan so‘ng u uzoq vaqt maydonga yotib olgan. Shifokorlar bilan maslahatlashganidan so‘ng futbolchi mashg‘ulotlarni davom ettirmoqchi bo‘ldi, biroq tez orada oqsoqlanib maydonni tark etdi.

Qayd etilishicha, futbolchi o‘ng tizzasidan jarohat olgan.

2021/22 yilgi mavsumda Levandovski "Bavariya" safida 36 ta o‘yinda maydonga tushib, 43 ta gol urdi va 4 ta golli uzatmani amalga oshirdi.