Portugaliya terma jamoasi hujumchisi Diogu Jota Jahon Chempionati-2022 musobaqasi uchun pley-off bosqichi doirasidan joy olgan Turkiyaga qarshi bahs oldidan o‘z fikrlarini bildirib o‘tdi.

"Turkiya siz o‘ylagandek oson raqib emas. Ular Niderlandiyadan keyin ikkinchi o‘rinni egallashdi va bitta bahsda g‘alaba qozonishdi. Bu finaldek o‘yin bo‘ladi va umid qilamanki, Portugaliya maydonda Turkiyadan yaxshiroq ekanligini isbotlaydi.

Biz ushbu o‘yinga javobgarlik hissi bilan kirishimiz kerak, lekin bunga juda katta e’tibor qaratmasligimiz lozim. Bu futbol bahsi. O‘ylaymanki, mazkur o‘yinda g‘alaba qozona olamiz va biz finalga borish uchun sifatlarga egamiz. E’tiborimiz Jahon chempionatiga yo‘llanma olishga qaratilgan. Boshqa hech narsa haqida o‘ylamayapmiz.

Turkiya oson raqib emas, lekin Portugaliya g‘alaba qozonishi uchun barcha narsaga ega. Jamoa imkoniyatlardan to‘liq foydalanishi uchun samarali harakat qilishi lozim. Shuningdek, Jahon chempionatiga chiqishimiz uchun yaxshi jamoaviy ruhiyatni saqlab qolishimiz kerak. Gol urish muhim, ammo raqiblarga imkoniyat qoldirmaslik ham alohida ahamiyat kasb etadi".

Portugaliya terma jamoasi bosh murabbiyi Fernandu Santush: "Ertaga qanday o‘ynashimiz kerakligi haqida bor e’tiborimni qaratganman va biz nima qilish kerakligini bilamiz. Jamoaning e’tibori juda yuqori va katta motivasiyaga ega. Biz javobgarligimiz tufayli shu yerda ekanligimizni bilamiz va buni boshidanoq o‘z bo‘ynimizga olamiz. G‘alaba qozonishimiz va Jahon chempionatiga chiqishimiz kerak va e’tiborimiz ertaga bo‘ladigan Turkiyaga qarshi o‘yinga qaratilgan".

Turkiya terma jamoasi ustozi Stefan Kuntz: "Jamoa bizga kerak bo‘lgan ruhiy kuchga ega ekanligimizni ko‘rsatib berdi. Jamoa ruhiyati ham yordam beradi. Bir qancha qiyin o‘yinlarni o‘tkazdik, ammo g‘alaba qozondik. Hisobda ortda qolib ham g‘alaba qozona olamiz. Biz to‘g‘ri yo‘nalishda ketyapmiz".

Eslatib o‘tamiz, Portugaliya - Turkiya bahsi bugun Toshkent vaqti bilan 00:45 da boshlanishi rejalashtirilgan.