«Qirollik klubi» muxlislarining 14 mart kuni bo‘lib o‘tgan «Malyorka» - «Real» o‘yinida raqib safida ijara muddatini o‘tayotgan yaponiyalik yosh iqtidor Takefusa Kuboga alohida e’tibor qaratishgani tayin. 20 yoshli hujumkor futbolchi ham asl jamoasiga qarshi bahsga alohida shaylangani o‘z-o‘zidan tushunarli. Zero, uning bosh maqsadi - «Santyago Berna-beu»ga tezroq qaytish. Yapon yigiti Marca nashriga bergan intervyusida buni yana bir bora ta’kidladi. Taka shuningdek, CHLda «PSJ»ga qarshi kechgan bahsda ro‘y bergan «remontada»ga alohida to‘xtaldi, Luka Modrich va Vinisius Juniorga salom yo‘lladi.
- Taka, yozda oldingizda turli variantlar bor edi, jumladan, kuchliroq jamoalardan ham takliflar oldingiz. Biroq yakunda «Mal-orka»ga qaytishni ma’qul ko‘rdingiz. Nega?
- Chunki «Malyorka»ni yaxshi bilaman, jamoaning ko‘plab yigitlari bilan tanish edim. Qisqasi, barcha variantlar orasida shunisi eng yaxshisidek ko‘rindi.
- To‘g‘risini ayting, «Real»ga qarshi o‘yinga alohida tayyorgarlik ko‘rdingizmi?
- Menimcha, futbolchi har doim eng yuqori saviyasini ko‘rsatishga intilishi kerak. Buning uchun esa, mudom to‘g‘ri shug‘ullanish va o‘yinlarga munosib yondashish talab etiladi. To‘g‘ri, tan olaman, «Real» bilan uchrashuvning ahamiyati katta, baribir. Jumladan, men uchun.
- Sentyabr oyida tizzangiz jiddiy jarohatlandi. Muhimi, hammasi ortda qoldi, tiklanish jarayonida qiynalmadingizmi?
- Bu ham bir tajriba. Har holda, faoliyatimda ilk marta jiddiy jarohatga yo‘liqdim. Asosiysi, tibbiy shtab mutaxassislari, jamoadoshlarim va murabbiylar yordami bilan jarohatni asoratsiz yengib o‘tdim.
- Oxirgi vaqtlarda hakamlarga munosabat bildirishda ham ancha o‘zgarganingiz ko‘zga tashlanmoqda. Buni xarakteringiz shakllanayotganiga yo‘ysak bo‘ladimi?
- Ehtimol. Lekin tabiatan ancha bosiqman. Faqat raqiblar yaqqol qo‘pollik ishlatishsayu, bu holat e’tiborsiz qoldirilsagina hakam bilan muloqotga kirishishim mumkin.
- «Real» CHLda «PSJ»ni qanday yengganini ko‘rdingizmi?
- Albatta, ko‘rdim. Nima, shunday o‘yinni o‘tkazib yuborishim mumkinmidi? Ajoyib «remontada»! O‘yinda kuzatilgan yuqori sur’at va ayniqsa, «Madrid»ning yondashuvi e’tiborga molik, albatta. O‘zi «Santyago Bernabeu» chindan ham, har doim jamoaga o‘zgacha turtki beradi. Qisqasi, arena o‘sha oqshom ham o‘z ishini mukammal bajardi - sehrli kecha.
- Vaqti kelib, «Santyago»da «Madrid»ning xuddi shunday sehrli o‘yinlarida qatnashishni tasavvur qila olasizmi?
- Futbolchi borki, shunday elit bahslarda maydonga tushish va g‘alaba zavqini tuyishni orzu qiladi. Albatta, men ham bundan mustasno emasman. Maqsadim o‘sha-o‘sha - «Madrid»ga qaytish.
- «PSJ» bilan bahsda sizni aynan qaysi futbolchi ko‘proq hayratga soldi?
- Luka Modrich! U - beqiyos.
- Vinisius o‘yinidagi o‘sishni qanday baholaysiz? U xuddi siz kabi vertikal futbolga ishtiyoqmand yosh futbolchi.
- O‘zi Vinisiusga oldin ham elit futbolchidek qarardim. Mana, hozirgi shaxsiy statistikasi adashmaganimni ko‘rsatib turibdi. Yaqqol sezilib turibdi, Vinnida o‘ziga ishonch hissi ancha ortgan. U joriy mavsum La Ligada eng yaxshi ijrochilardan biri ekanligini isbotlamoqda.
M.PO‘LATOV tayyorladi
