FIFA kunlari munosabati bilan chempionatimizda yuzaga kelgan bo‘shliqni “Metallurg” murabbiylari ko‘rik-nazorat uchrashuvi bilan to‘ldirishdi. Bugun Bekobodga Osiyo chempionatiga hozirlik ko‘rayotgan O‘zbekiston U-20 terma jamoasi tashrif buyurdi.
Yoshlarga qarshi o‘tkazilgan sparring raqobat anchagina qiziqarli o‘yinni taqdim etdi. Birinchi bo‘limda “Metallurg” murabbiylari shtabi asosiy tarkibda kamroq o‘yin amaliyotiga ega bo‘layotgan futbolchilarni maydonga tushirishdi. Bu taym “Metallurg” jamoasining 1:0 hisobidagi g‘alabasi bilan yakunlandi. Standart vaziyatda – burchakdan to‘p uzatilganda O‘zbekiston yoshlar terma jamoasi himoyachisi Sherzod Esonov o‘z darvozasiga to‘p kiritib qo‘ydi.
Ikkinchi bo‘limda Luisma Ernandes tarkibni to‘liq almashtirdi va maydonga “Metallurg U-21” o‘yinchilari tushirildi. Natijada tashabbus Ravshan Haydarov shogirdlari tomoniga o‘tdi va Rustam Turdimurodov va Shahriyor Jabborovlar tomonidan kiritilgan gollar evaziga O‘zbekiston U-20 jamoasi zafar quchdi. Yoshlar terma jamoasi yig‘iniga chaqirilgan “Metallurg” posboni Humoyunshoh Sayyotovga bugun dam berildi. Yarim himoyachi Shahzodjon Ne’matjonov esa yoshlar terma jamoasining birinchi goliga assistentlik qildi.
Nazorat uchrashuvi
“Metallurg” – O‘zbekiston U-20 terma jamoasi – 1:2 (1:0).
Bekobod. 26 mart. “Metallurg” markaziy stadioni.
Hakamlar: Asker Najafaliyev, Ruslan Serazetdinov, Alisher Usmonov
Gollar: Sherzod Esonov (avtogol) – Rustam Turdimurodov, Shahriyor Jabborov
