Bugun "Navruz cup-2022" xalqaro o‘rtoqlik turniri musobaqasining final bosqichi bo‘lib o‘tadi. Unda O‘zbekiston terma jamoasi ugandalik futbolchilarga qarshi to‘p tepishadi. Ikkala jamoa ham bu bosqichga katta qiyinchiliklar bilan yetib kelishdi: O‘zbekiston Qirg‘iziston ustidan irodali g‘alabaga erishgan bo‘lsa, Uganda tojiklar bilan masalani penaltilar seriyasida hal qildi.

O‘yin soat 19:00 da Namangan shahridagi "Markaziy" stadionda boshlanadi. Unda Uganda terma jamoasi o‘zining asosiy libosi bo‘lmish qizil rangli libosda, O‘zbekistonlik futbolchilar  esa oq rangli libosda maydonga tushadi. Darvozabonimiz yashil rangli forma kiyadi.

O‘zbekiston va Uganda o‘rtasidagi final uchrashuvini boshqarish tojikistonlik hakamlarga topshirildi. Sayyodjon Zayniddinov bosh hakam vazifasini bajarsa, unga qanotlarda Vafo Karayev va Ismoil Nuraliyev yordam beradi. Zaxira hakami vazifasi esa Nasrullo Kabirovga yuklatilgan.

Namangan deganda futbol muxlislarining ko‘z o‘ngida muxlislar bilan to‘lib-toshgan maydon gavdalanadi. Namangan maydonlari mehmonlar uchun doim qiyinchilik tug‘dirib kelgan, chunki namanganlik muxlislar har safar o‘z suyuklilalarini yuqori darajada qo‘llab-quvvatlashadi, bu esa mezbonlarga kuch, mehmonlarga esa qiyinchiliklar keltirib chiqaradi.

Mazkur o‘yinga chiptalar barcha sektorlar uchun bir xil narxda — 20.000 so‘mdan sotilmoqda.

Hozirgi kunda FIFA reytingida Uganda 84-pog‘onani band etib turgan bo‘lsa, O‘zbekiston terma jamoasi undan bir pog‘ona pastda — 85-o‘rinda.

Eslatib o‘tamiz, bu kunga qadar jamoalar bironta rasmiy uchrashuvda yoki o‘rtoqlik o‘yinida bir-biriga to‘qnash kelishmagan.