"Chelsi"ga Premyer-liganing joriy mavsumining qolgan uy uchrashuvlari uchun chipta sotish rasman taqiqlandi.

Klub "Stemford Bridj" tribunalariga faqat abonement egalari tashrif buyurishi mumkinligini e’lon qildi. Biroq oddiy muxlislarda 6 aprel kuni bo‘lib o‘tadigan "Real"ga qarshi Chempionlar ligasi chorak final uchrashuviga borish imkoniyati bor. Chiptalarni Angliya kubogi yarim finali, London derbisida “Kristal Pelas” va “Sautgempton”ga qarshi safar o‘yini uchun ham olish mumkin.

Eslatib o‘tamiz, 10 mart kuni Buyuk Britaniya hukumati "Chelsi"ning rossiyalik xo‘jayini Roman Abramovichga nisbatan sanksiyalar joriy etib, uning barcha aktivlarini muzlatib qo‘ygan edi. O‘shandan beri klub o‘z daromadining katta qismini, jumladan chipta sotishdan tushgan foydani ham yo‘qotdi.

O‘tkazilgan 28 o‘yindan so‘ng “Chelsi” APL turnir jadvalida peshqadam “Manchester Siti”dan 11 ochko ortda qolib, uchinchi o‘rinda bormoqda.