Superliga-turidan o‘rin olgan "Qo‘qon-1912" - "Metallurg" uchrashuvi uchun prevyu bilan tanishing.

“Qo‘qon 1912” va “Metallurg” jamoalari mamlakat milliy chempionatlari doirasida bugungacha o‘zaro 24 marta to‘qnash kelgan.  Mazkur o‘yinlarning 12 tasida Toshkent viloyati vakillarining qo‘li baland kelgan bo‘lsa, 2 ta o‘yinda durang natija qayd etilgan. 10 ta o‘yin esa vodiylik futbolchilarning g‘alabasi bilan yakunlangan. Kiritilgan va o‘tkazib yuborilgan to‘plar farqida kichik ustunlik poytaxt viloyati vakillari tomonida – 36:33.

“Metallurg”ning o‘zaro uchrashuvlardagi eng yirik hisobdagi g‘alabasi 2000 yilgi chempionatda kuzatilgan bo‘lib, o‘shanda bekobodliklar “Temiryo‘lchi”ni 6:1 hisobida dog‘da qoldirgandi. Qo‘qonliklarning yirik g‘alabasi 5:1 (1999) va 4:0 (2003) ko‘rinishini olgan. Jamoalar birinchi mavsumda (1998) har ikkala uchrashuvda bir xil – 1:1 hisobida durang o‘ynagan. Shundan buyog‘iga mazkur klublar o‘yinida tomonlardan birining qo‘li baland kelgan.

O‘tgan yilgi mavsumning har ikkala uchrashuvida mezbonlar imkoniyatni boy berishgan. “Metallurg” birinchi davrada Qo‘qonda bo‘lib o‘tgan uchrashuvni hakam tomonidan qo‘shib berilgan kompensasiya vaqtida Salamat Quttiboyev tomonidan kiritilgan gol evaziga o‘z foydasiga hal etgandi. Ikkinchi davrada esa “Qo‘qon 1912” jamoasi 70-daqiqada Ivan Yosovichning penaltidan urgan goli evaziga revansh olgan.