Суперлига-туридан ўрин олган "Қўқон-1912" - "Металлург" учрашуви учун превью билан танишинг.
“Қўқон 1912” ва “Металлург” жамоалари мамлакат миллий чемпионатлари доирасида бугунгача ўзаро 24 марта тўқнаш келган. Мазкур ўйинларнинг 12 тасида Тошкент вилояти вакилларининг қўли баланд келган бўлса, 2 та ўйинда дуранг натижа қайд этилган. 10 та ўйин эса водийлик футболчиларнинг ғалабаси билан якунланган. Киритилган ва ўтказиб юборилган тўплар фарқида кичик устунлик пойтахт вилояти вакиллари томонида – 36:33.
“Металлург”нинг ўзаро учрашувлардаги энг йирик ҳисобдаги ғалабаси 2000 йилги чемпионатда кузатилган бўлиб, ўшанда бекободликлар “Темирйўлчи”ни 6:1 ҳисобида доғда қолдирганди. Қўқонликларнинг йирик ғалабаси 5:1 (1999) ва 4:0 (2003) кўринишини олган. Жамоалар биринчи мавсумда (1998) ҳар иккала учрашувда бир хил – 1:1 ҳисобида дуранг ўйнаган. Шундан буёғига мазкур клублар ўйинида томонлардан бирининг қўли баланд келган.
Ўтган йилги мавсумнинг ҳар иккала учрашувида мезбонлар имкониятни бой беришган. “Металлург” биринчи даврада Қўқонда бўлиб ўтган учрашувни ҳакам томонидан қўшиб берилган компенсация вақтида Саламат Қуттибоев томонидан киритилган гол эвазига ўз фойдасига ҳал этганди. Иккинчи даврада эса “Қўқон 1912” жамоаси 70-дақиқада Иван Йосовичнинг пенальтидан урган голи эвазига реванш олган.
