Angliyaning “Tottenxem” klubi joriy mavsum yakunida Italiyaning “Yuventus” klubi bilan London jamoasi vingeri Deyan Kulushevskini to‘liq sotib olishni rejalashtirmoqda. Bu haqda jurnalist Ekrem Konur xabar berdi.
Ma’lumot uchun, 21 yoshli Kulushevski qishki transfer oynasida bir yarim yillik ijara asosida "Tottenxem"ga o‘tgan edi.
Shvesiyalik futbolchi inglizlar safida 11 ta o‘yinda maydonga tushib, 2 ta gol urdi va 4 ta golli uzatmani amalga oshirdi.
Avvalroq "shporlar" Kulushevskini 35 million yevroga sotib olishi mumkinligi haqida xabar berilgandi.
