Chinakam professional futbolchi sifatida shakllanish maqsadida 17 yoshidayoq yaqinlaridan uzoqlashib, Yevropaga yo‘l olgan Erik Bayi bugun Angliyada Kot-d~Ivuar nomidan to‘p surayotganidan bag‘oyat baxtiyor. Allaqachon 27 yoshni urib qo‘ygan baquvvat himoyachi yevroarenadagi faoliyatini Ispaniyaning «Espanyol» jamoasida boshlagandi. Ivuarlik futbolchi shundan 3 yil o‘tib, La Ligada debyutini nishonladi, keyin 18 oy davomida «Vilyarreal» sharafini himoya qildi. 2016 yili esa «MYU» safini to‘ldirdi. Erik «qizil iblislar» futbolchisi maqomida Kot-d~Ivuar milliy jamoasining naq 27ta o‘yinida qatnashdi. Umuman, Bayi o‘z mamlakati bosh jamoasi libosida 42 marta maydonga tushishga ulgurdi. U yaqinda manutd.com saytiga intervyu berib, jonajon vatani uchun har qanday mushkulotlarni yengib o‘tishga tayyorligini bildirdi.
- Erik, odatda Kot-d~Ivuar milliy jamoasi yig‘iniga katta ishtiyoq bilan yo‘l olasiz. Vaholanki, uzoq parvozlar har qanday futbolchini toliqtirib qo‘yishi mumkin...
- Kot-d~Ivuar men uchun hammasidan ustun. Bu - vatanim, oilam, do‘stlarim. Shunday ekan, milliy jamoaga borishda qandaydir muammo ko‘rishim mumkinmi? Aksincha, Angliya va Manchesterda Kot-d~Ivuar vakili sifatida o‘ynayotganim alohida g‘urur bag‘ishlaydi. Umuman, Kot-d~Ivuar haqida gapirganda, hamisha to‘lqinlanib ketaman. Vatanga muhabbat shu bo‘lsa kerak.
- Bilamizki, Kot-d~Ivuar futboli ko‘plab iqtidorlari bilan mashhur. Biroq milliy jamoa jahon arenasidagi katta yutuqlari bilan maqtanolmaydi. Buni qanday izohlaysiz?
- Ha, mamlakatimizdan ajoyib futbolchilar chiqqan. Xususan, Didye Drogba Yevropada ham afsona darajasiga ko‘tarildi. Esimda, Kot-d~Ivuar milliy jamoasi o‘ynaganida, Drogba harakatiga alohida e’tibor qaratardim. Oddiy aytganda, uning o‘yini hamma qatori menga ham zavq bag‘ishlardi. Endi savolingizga kelsak, barchasi infratuzilma va tizimga bog‘liq bo‘lsa kerak. Zero, futbolda iqtidorlarning o‘zi bilan ish bitmaydi. Muvaffaqiyat uchun hammasi uyg‘unlashishi kerak.
- Kot-d~Ivuar futbolining yana bir yorqin namoyandasi - Yaya Ture haqida nima deya olasiz?
- O, Yayani ta’riflashga til ojiz. Aynan Ture va Drogba barchamiz uchun chinakam namuna edilar. Qoyilmaqom futbolchilar. Ular bejiz APL tarixidagi eng buyuk o‘yinchilar qatoriga kirishmagan. Har ikkisi bilan har qancha faxrlansak, shuncha oz.
- Xo‘sh, terma jamoaning bugungi holati qanday?
- Tarkibimizda iqtidorli yigitlar yetarli. Asosiysi, mamlakatimizda odamlar futbolni juda yaxshi ko‘radilar. Demakki, bolalar futbol bilan shug‘ullanaveradilar va yangi-yangi nomlar chiqishiga ishonaman.
- Mamlakatingizdagi iste’dodli yigitlarga qanday maslahat berasiz?
- Ular Yevropaga kelib, o‘z salohiyatlarini ko‘rsatishdan cho‘chimasliklari kerak. O‘z navbatida, yosh iqtidorlarga shunday imkoniyat beradigan tizim yaratish ham muhim. Bizda yosh yigitlar bor kuch bilan shug‘ullanishdan qochmaydilar. Shunday yondashuvni oxirigacha ushlasalar, kun kelib xuddi men, «Arsenal»dagi Nikolya Pepe yoki Uilfrid Zaa kabi Angliyada o‘ynash imkoniyatiga ega bo‘lishlari tayin.
