«Milan» hujumchisi Zlatan Ibrahimovich, agar «rossonerilar» klubi Italiya chempionligini qo‘lga kiritsa, faoliyatini yakunlashi mumkin, deb xabar beradi La Gazzetta dello Sport.
40 yoshli shvedning «Milan» bilan shartnomasi 2022 yilning yozida yakuniga yetadi va yangi bitim borasida muzokaralar hali boshlanmagan. Ibrahimovichning qaroriga qaramay, milanliklar kelasi mavsum uchun yangi hujumchi qidirmoqda.
Agar Ibrahimovich faoliyatini davom ettirmoqchi bo‘lsa, klub unga kamroq maosh taklif qiladi. Amaldagi shartnomaga ko‘ra, hujumchi yiliga 7 million yevroga yaqin maosh oladi.
23 yillik faoliyati davomida Ibragimovich 559 ta gol urgan.
2021/22 yilgi mavsumda forvard «Milan» safida 23 ta o‘yin o‘tkazib, 8 ta gol urgan.
A seriyaning 31-turidan keyin Milan klubi 67 ochko bilan turnir jadvalida birinchi o‘rinda bormoqda.
