Qozog‘iston. Mamlakat Premyer-ligasi 4-turi «Ordabasi» uchun omadsiz keldi. Tarkibida hamyurtimiz Odil Abdumajidov to‘p surayotgan Shimkent klubi bu safar «Kaspiy» mehmoni bo‘lib, ortga mag‘lubiyat bilan qaytdi - 1:2. Legionerimiz ushbu uchrashuvda ham to‘liq 90 daqiqa harakatlandi. «Ordabasi» keyingi tur o‘yinini 9 aprel kuni o‘z maydonida «Tobol»ga qarshi o‘tkazadi. Aytish o‘rinli, Igor Sergeev jamoasi 4-tur bahsida «Turan»ni 3:0 hisobida yengish asnosida turnir jadvali peshqadamiga aylanib oldi. Igor ushbu g‘alabaga 81 daqiqalik faol harakati bilan hissa qo‘shdi. «Qayrat» esa mehmonda «Akjayik» darvozasiga yo‘l topolmadi - 0:0. Jamoaning o‘zbekistonlik yarim himoyachisi Jasur Jaloliddinov bu bahsni asosiy tarkibda boshladi va 65-daqiqada o‘z o‘rnini zaxira vakiliga bo‘shatib berdi.
Eron. Mamlakat chempionati 24-turidan o‘rin olgan «Havodor» - «Persepolis» o‘yinida hisob ochilmadi. Ham-yurtimiz Sherzod Temirov to‘liq vaqt to‘p surgan va 83-daqiqada sariq kartochka olgan uchrashuvda tehronliklar yetarlicha hujum uyushtirishdi, ammo samara chiqaradigan futbolchi topilmadi.
Tojikiston. Mamlakat chempionati Oliy ligasi 1-turidan o‘rin olgan «Fayzqand» - «Istaravshan» o‘yinida mehmon jamoa 5:0 hisobida g‘alabaga erishdi. E’tiborli tomonida, «Istaravshan» safida hamyurtimiz o‘zini ko‘rsatdi - Otabek Zokirov «dubl»ga erishdi. «Esxata» - «Xo‘jand» uchrashuvi 90}3-daqiqasida urilgan yagona hal qiluvchi gol Shahzod Abdurahimov hisobiga yozildi. Shunga muvofiq, «Esxata»da o‘ynayotgan futbolchimiz o‘yinning eng yaxshi futbolchisi sifatida e’tirof etildi.
O‘z o‘rnida qiziqarli ma’lumot: 2 aprel kuni start olgan Tojikiston chempionatining yangi mavsumi uchun klublar tomonidan jami 59 nafar legioner ro‘yxatga kiritildi. Shundan 28 nafari o‘zbekistonlik futbolchilardir.
Tojikiston chempionati Oliy ligasidagi o‘zbekistonlik futbolchilar
«Istiqlol»: Muhammad Isayev
«Xo‘jand»: Samandar Ochilov, Firdavs Abdusalimov, Shohruh Mahmudhojiyev
SSKA: Azamat Ahmedov
«Istaravshan»: Javohir Rasulov, Otabek Zokirov, Nodir Kamolov
«Xatlon»: Jamshid Hamidov, Rustam Qo‘chqorov
«Esxata»: Shahzod Abdurahimov, Sanjar Rixsiboyev, Shahzod Ma’murjonov, Jahongir Safarov, O‘ktam Hazratov, Dilshod Xushbakov
«Fayzqand»: Mirkomil Loqayev, Amirjon Safarov, Anvar Murodov
«Regar TaDaz»: Ja’far Ismoilov, Sergey Proxorov, Saveliy Abramov
«Ravshan»: Muhriddin Ahmedov, Zufar Akbaraliyev, Doston Berdiqulov, Javohir G‘aybullayev, Zafar Qoraqulov, Behruz Do‘stmurodov.
Bangladesh. Mahalliy Premyer-liga 10-turida «o‘zbekcha derbi» kuzatildi. Aniqroq aytsak, «Saif Sporting» - «Baridhara» o‘yini (3:0)da Asror G‘ofurov va Evgeniy Kochnev o‘zaro to‘qnash kelishdi. G‘ofurov 1tadan gol va samarali uzatma muallifiga aylangan bo‘lsa, Kochnev 87-daqiqada qizil kartochka oldi.
