O‘zbekiston Kubogi guruh bosqichi doirasidagi “Yangiyer” – “Andijon” (1:3) uchrashuvidan keyin matbuot anjumani tashkil etildi.
Mezbonlar bosh murabbiyi Bekzod Qodirqulov mag‘lubiyat sababini quyidagicha izohladi:
- Bugun mag‘lubiyatga uchradik, bunga bahona qidirish shart emas. Ayniqsa, birinchi taymda futbolchilarimni tanimadim. Ikkinchi bo‘limda hujumkorlikni oshirdik. Ammo qarshi hujumlar va standartlar orqali gol o‘tkazib yubordik. Vaholanki, uchrashuvdan avval barcha futbolchiga o‘z vazifasini batafsil tushuntirgandim. Bugun “Andijon” o‘z imkoniyatlaridan foydalanib ketdi. Mag‘lubiyatni o‘z bo‘ynimga olaman. Xato mendan o‘tdi.
“Andijon” ko‘pchilik aytganidek, faqat havodan o‘ynamaydi. Ularga imkon berilsa, pas orqali ham yaxshi o‘ynay oladi. Buni bugungi uchrashuvda ko‘rdik. Bu borada ularga imkon berdik. Hujum bilan yarim himoya chizig‘imizda bog‘liqlik yo‘q edi. Biz “Andijon” jamoasiga o‘ynashga imkon yaratib berdik. Natijada ular maydonda xohlaganini qilishdi va erkin o‘ynashdi.
Ko‘ryapsiz, beshinchi mag‘lubiyatga uchradik. Biz doim maydonga faqat g‘alaba uchun tushamiz. Bu chempionat bo‘ladimi yoki Kubok uchrashuvimi, farqi yo‘q. Bizga g‘alaba suv va havodek zarur edi. Ertaga yigitlar bilan o‘tirib jiddiy gaplashib olamiz.
