"Ayaks" himoyachisi Nussair Mazraui "Bavariya"ga o‘tishga yaqin turibdi, deya xabar beradi jurnalist Nikolo Skira.

Manbaga ko‘ra, Myunxen klubi 24 yoshli marokashlik futbolchining agenti bilan futbolchini erkin agent sifatida transfer qilish borasida kelishib olgan. Shartnoma 2026 yilgacha mo‘ljallangan va yana bir mavsumga uzaytirilishi mumkin bo‘ladi. Unga ko‘ra, futbolchining maoshi yiliga 4 million yevroni tashkil qiladi.

Joriy mavsumda Mazraui 32 ta o‘yinda maydonga tushib, 5 ta gol urdi va 4 ta golli uzatmani amalga oshirdi. Transfermarkt portali futbolchining narxini 20 million yevroga baholamoqda.