O‘zbekiston kubogi guruh bosqichi, 3-turidan o‘rin olgan “Navbahor” – “Neftchi” o‘rtasidagi uchrashuv arafasida “lochinlar”ning 27 yoshli tajribali yarim himoyachisi Jamshid Iskanderov bo‘lajak o‘yin haqidagi fikrlari bilan o‘rtoqlashdi.

-  Har bir uchrashuvda chiroyli o‘yin namoyish etgan holda, g‘alaba qozonib,  muxlislarga quvonch ulashishga harakat qilamiz. Bo‘lajak bahs ham bundan mustasno bo‘lmaydi, albatta. “Navbahor” – “Neftchi” ishtirokidagi “vodiy derbisi” o‘yinlarini ko‘p marotaba tomosha qilganman hamda keskin kurashlar ostida o‘tishiga guvoh bo‘lganman. Endi esa bevosita o‘zimda shunday ajoyib derbida qatnashish imkoniyati tug‘ilmoqda.

Xudoga shukr,O‘zbekiston kubogi bahslarida dadil odimlayapmiz va farg‘onaliklar bilan bo‘ladigan bellashuvda ham zafar quchib, O‘zbekiston kubogining  guruh bosqichi bahslarini yuz foizlik natija qayd etgan holda,  peshqadam sifatida yakunlash niyatidamiz. Bo‘lajak derbi prinsipial ahamiyatga ega bo‘lganligi bois, qiziqarli, chiroyli, keskin kurashlarga boy o‘tadi, degan umiddaman.

Fursatdan foydalanib, muxlislarga ushbu muqaddas Ramazon oyidagi ibodatlarini Alloh o‘z dargohida qabul qilishini tilab qolaman.        

Shuningdek, ishqibozlardan bo‘lajak o‘yinda stadionga ko‘proq tashrif buyurib, jamoamizni bevosita qo‘llab-quvvatlab, biz – futbolchilarga madadkor bo‘lishlarini so‘rayman.

Biz esa muxlislarning qo‘llab-quvvatlashlariga yarasha maydonda munosib to‘p tepib, ularga quvonch ulashishga intilamiz hamda g‘alaba qozonish uchun barcha imkoniyatimizni ishga solamiz.

Baxtimizga “Navbahor” ishqibozlari hamisha sog‘ bo‘lishsin.