OCHL guruh bosqichining 4-tur doirasida "Duxayl" jamoasi bilan bellashuvdan avval bosh murabbiy Slavche Voyneski va himoyachi Farruh Sayfiyev matbuot anjumanida qatnashib, o‘yin haqida fikrlarini bildirishdi.
Voyneski: - Ertaga bizni qiziqarli va muhim o‘yin kutib turibdi. Ikkinchi davra bahslari boshlanadi. Maqsadimiz chiroyli futbol ko‘rsatish va g‘alaba qozonish. Shogirdlarim va butun jamoa bilan faqat yutuq haqida o‘ylayapmiz. Muxlislarimiz bizdan ijobiy natijalar kutishmoqda. Oldimizda turgan uchrashuvlarda zafar quchishga bor kuchimiz bilan intilamiz. "Duxayl" bilan birinchi bellashuvdan zarur xulosalarni chiqardik. Raqib yetakchisi Edmilsonga qarshi qanday harakat qilishimizni ertaga ko‘ramiz.
Sayfiyev: - Biz uchun juda muhim o‘yin arafasida turibmiz. Maydonda g‘alaba uchun borimizni beramiz. Avvalgi bahsda raqibdan individual mahorat sohibi Edmilson yodda qoldi, u "Duxayl"ning eng kuchli nuqtasi bo‘ldi. Kelayotgan o‘yinda barchasini to‘g‘rilashga urinamiz.
