Superliga 5-turi doirasidagi «Dinamo» - «Lokomotiv» uchrashuvida (3:1) Samarqand jamoasi Toshkent klubi ustidan muhim g‘alabaga erishgach, o‘yindan keyin mezbonlar bosh murabbiyi Predrag Rogan fikrlari bilan o‘rtoqlashdi.

- Jamoamizdagi yigitlar sovg‘a tayyorlashdi, bugungi g‘alaba ularniki. Ular ushbu g‘alaba uchun 3 oy ishlashdi. Avvalgi bahslarda omadimiz kelmay, yutqazganimizda ham ularga g‘alabalar oldinda ekanini aytgandim va bugun ular Superligada o‘ynay olishlarini isbotlashdi. Biz bu g‘alabani unutib, ertadan keyingi o‘yinlarga tayyorgarlikni boshlaymiz.

- Avvalgi o‘yinlar bilan taqqoslaganda tarkib va taktikada o‘zgarishlar bo‘ldi. Ayniqsa, yarimhimoyachi Yevgeniy Chumakni himoyada o‘ynashi kutilmagan qaror bo‘ldi...
- Chempionat boshlanganda biz hali hamma futbolchilarning ham imkoniyatlarini to‘liq bilmasdik va muammolarni o‘yindan-o‘yinga o‘tib, ko‘rib bordik. Bugungi o‘yin uslubimiz ustida biz uch hafta ishladik. Chumak yangi pozisiyada ham yaxshi o‘yin namoyish etdi, ammo jarohat oldi. Uning holati qanday bo‘lishini keyingi kunlarda ko‘ramiz.

- «Dinamo»ni navbatdagi o‘yinda 5 kundan keyin «Neftchi» kutib turibdi. Jamoa jismonan qanchalik tiklanishga ulguradi?
- Uzr, bugun biz faqat shu o‘yin haqida gapirib, keyingi o‘yin haqida ertadan o‘ylamoqchimiz. Ko‘rdingiz, Ibrohim Yo‘ldoshev va Yevgeniy Chumak jarohat oldi. Biz ularning tiklanish jarayoni qanday kechishini bilishimiz kerak.

Shunga qaramay, «Lokomotiv» bilan bahsdan keyin jamoamizda kayfiyat yaxshilandi, biz «Neftchi»ga qarshi o‘yinda ham katta ishtiyoq bilan tayyorgarlik ko‘ramiz. Bugungi g‘alaba butun jamoaniki. Keyingi o‘yinlarda ham muxlislarni bugungidek xursand qilishga intilamiz. Samarqandlik muxlislar – men ko‘rgan eng yaxshi ishqibozlar! Ularga ajoyib muxlislik uchun rahmat aytaman.