«Uigan» darvozaboni Ben Eymos hech qachon o‘rniga muxlislardan biri da’vogarlik qilishi mumkinligi haqida o‘ylamagani aniq. Lekin bu hayot turfa xil holatlarga to‘la... Xullas, Eymos «Akkrington»ga qarshi bahsda jarohatga yo‘liqdi va u shifokorlardan tibbiy yordam olayotgan vaqt darvozabon libosini kiyib olgan muxlislardan biri faollik bilan chigilyozdi mashg‘ulotlarini boshlab yubordi...
30 yoshli Neytan Konvey o‘yindan keyin o‘z xatti-harakatini oddiy izohladi: «To‘g‘risi, darvozabonimiz jarohatlangach, buni o‘zim uchun yaxshi imkoniyatdek ko‘rdim».
Gap yo‘q, ammo u shunchaki, «Uigan» muxlisi va tabiiyki, klub qaydnomasida nomidan nishona ham yo‘q. Konvey bularga e’tibor qaratmay, ishtiyoq bilan yengil mashqlarni bajarishga kirishdi. Hattoki, ijtimoiy tarmoqlarda uning harakatlari aks etgan videolar to‘lib ketdi. Ta’kidlanishicha, Neytan o‘yindan oldin do‘stlari bilan mahalliy barga kirgan. Xullas, hamrohlari o‘sha joyda havaskor kiperga «Uigan» klubi darvozabonlar libosi to‘liq to‘plami kerakligini tushunishgan. Shu tariqa ular bardan chiqib, klub do‘konidan kerakli formalarni sotib olishgan.
Voqealarning keyingi rivojiga to‘xtalsak, «Uigan» darvozaboni tibbiy yordamdan keyin o‘z joyiga qaytdi, uning nogahoniy o‘rinbosari esa tribunaga. Ha, Konveyning o‘ylagani amalga oshmadi, muhimi, u muxlislar olqishiga sazovor bo‘ldi, jamoa bosh murabbiyi ham qo‘lini qattiq qisib qo‘ydi. Konvey endi keyingi uchrashuvlarga maydon futbolchisi formasida kelishni rejalashtirmoqda...
