Kecha "Paxtakor" klubi Osiyo chempionlar ligasi guruh bosqichining so‘nggi turida Saudiya Arabistonining "At-Ta’vun" jamoasini mag‘lub etgach, ko‘pchilikning xayoliga, agar "sherlar" avvalgi turda "Sepahon"ni mag‘lub etganida, 9 ochko bilan keyingi bosqichga chiqqan bo‘lardi-ya, degan fikr kelgan bo‘lsa ajabmas (masalan, Hojimat Erkinov qo‘shib berilgan daqiqalarda eronliklar darvozasiga bosh bilan emas, oyoq bilan zarba berib, gol urganida...).

Bu fikrda jon bor, axir "Nasaf" bugun "Al-Vihdat"ga kichik hisobda yutqazsa ham, 8 ochko bilan pley-offga chiqishga yaqin turibdi. Ammo... Ammo OCHL pley-off bosqichiga har ikki o‘zbek klubi bir vaqtning o‘zida chiqa olmasdi. Chunki 2-o‘rinni egallagan jamoalar orasida ikki klub ("Shabab al-Ahli" va "Ar-Rayyan") kamida 10 ochko to‘plab qo‘ygan. G‘arb mintaqasida uchinchi yo‘llanma uchun "Paxtakor" va "Nasaf" kurashgan bo‘lardi.

Bunday holatda "Al-Vihdat"ga qarshi o‘yinda Berdiyev jamoasini mag‘lubiyat (kichik hisobdagi) aslo qoniqtirmasdi. Qarshiliklar 2-o‘rinni egallaganlar reytingida "Paxtakor"dan oldinda bo‘lish uchun iordaniyaliklar bilan kamida durang o‘ynashi talab etilardi ("Vihdat" esa pley-off bosqichiga chiqish imkoniyatidan to‘liq mahrum bo‘lgan bo‘lardi).

Shunday ekan, "Paxtakor" 5-turda g‘alaba qozonganida ham, faqat bitta o‘zbek klubi OCHLning pley-off bosqichida ishtirok etish huquqini saqlab qolgan bo‘lardi. "Nasaf" esa bugun ijobiy natija qayd etib, bu yo‘llanmani qo‘lga kiritishi kerak. Jamoaga omad tilab qolamiz.