Кеча "Пахтакор" клуби Осиё чемпионлар лигаси гуруҳ босқичининг сўнгги турида Саудия Арабистонининг "Ат-Таъвун" жамоасини мағлуб этгач, кўпчиликнинг хаёлига, агар "шерлар" аввалги турда "Сепаҳон"ни мағлуб этганида, 9 очко билан кейинги босқичга чиққан бўларди-я, деган фикр келган бўлса ажабмас (масалан, Ҳожимат Эркинов қўшиб берилган дақиқаларда эронликлар дарвозасига бош билан эмас, оёқ билан зарба бериб, гол урганида...).

Бу фикрда жон бор, ахир "Насаф" бугун "Ал-Виҳдат"га кичик ҳисобда ютқазса ҳам, 8 очко билан плей-оффга чиқишга яқин турибди. Аммо... Аммо ОЧЛ плей-офф босқичига ҳар икки ўзбек клуби бир вақтнинг ўзида чиқа олмасди. Чунки 2-ўринни эгаллаган жамоалар орасида икки клуб ("Шабаб ал-Аҳли" ва "Ар-Райян") камида 10 очко тўплаб қўйган. Ғарб минтақасида учинчи йўлланма учун "Пахтакор" ва "Насаф" курашган бўларди.

Бундай ҳолатда "Ал-Виҳдат"га қарши ўйинда Бердиев жамоасини мағлубият (кичик ҳисобдаги) асло қониқтирмасди. Қаршиликлар 2-ўринни эгаллаганлар рейтингида "Пахтакор"дан олдинда бўлиш учун иорданияликлар билан камида дуранг ўйнаши талаб этиларди ("Виҳдат" эса плей-офф босқичига чиқиш имкониятидан тўлиқ маҳрум бўлган бўларди).

Шундай экан, "Пахтакор" 5-турда ғалаба қозонганида ҳам, фақат битта ўзбек клуби ОЧЛнинг плей-офф босқичида иштирок этиш ҳуқуқини сақлаб қолган бўларди. "Насаф" эса бугун ижобий натижа қайд этиб, бу йўлланмани қўлга киритиши керак. Жамоага омад тилаб қоламиз.