AGMK – “Qo‘qon-1912” uchrashuvidan keyingi matbuot anjumanida mehmonlar bosh murabbiyi Baxtiyor Ashurmatov ishtirok etdi.
- O‘yin qizil kartochka olgunimizga qadar teng kurashlar ostida o‘tayotgandi. Bizda vaziyat bo‘ldi, afsuski, Jamshid Hasanov birga-bir imkoniyatdan foydalana olmadi. Sanjar Tursunov juda chiroyli gol urdi. Tan olishimiz kerak, futbolchimiz maydondan chetlatilganidan keyin AGMK katta ustunlik bilan o‘ynadi. Shu bois g‘alabaga erishdi. AGMKni g‘alaba bilan tabriklayman. Biz esa keyingi uchrashuvlarga tayyorgarlik ko‘ramiz.
- Merzlyakov, Siddiqov kabi futbolchilarning o‘ynamagani jarohat bilan bog‘liqmi?
- To‘g‘ri, jamoamiz yetakchilari – Murod Xolmuhammedov, Aleksandr Merzlyakov va Javohir Siddiqovda jarohat bor edi. Shu sababli ularning yordamlaridan foydalana olmadik. Ammo bu bahona bo‘lmasligi kerak. Biz yutqazdik, AGMKni haqli g‘alaba bilan tabriklashimiz kerak. O‘ylaymanki, keyingi o‘yinlarga yuqoridagi o‘yinchilarimiz tayyor bo‘lishadi va tarkibimiz to‘liq bo‘ladi.
- Jamoada muammo yo‘qmi? Negadir o‘yindan tashqari vaziyatda futbolchilarni kayfiyati yo‘q deb eshitdik...
- Bo‘lishi mumkin. Buni jamoaning ichki siri deb o‘ylayman. Gapning ochig‘i, mag‘lubiyatga uchraganimizdan so‘ng, qaysidir sabablarni aytsam yarashmasa kerak. Bu vaziyatga to‘xtalishni xohlamagan bo‘lardim.
- Uchta o‘zgarishga qo‘l urdingiz va yana zaxira o‘zgarishlari qolib ketdi. Zaxiradan o‘yinchi tushiradigan boshqa variant ko‘rmadingizmi?
- Biz yigitlarga tanaffusda 1:0 hisobini ushlab, 15-20 daqiqa davomida extiyotkor bo‘lib o‘ynashimiz, ikkinchi golni o‘tkazib yubormasligimiz kerak, keyin uchta himoyachi bo‘lib tavakkal qilib 20-25 daqiqa hujumkorroq futbol namoyish etamiz deb ta’kidlagandik. Afsuski, ikkinchi golni o‘tkazib yubordik. Quvondiq Ro‘ziyev ham jarohat olgach, majburiy o‘zgarishga qo‘l urdik. Ikkita hujumchi bilan o‘ynaydigan bo‘lsak va markazdan Oybek Rustamovni o‘yindan olsak, juda katta tavakkalga qo‘l urgan bo‘lardik va markazda bo‘shliq yuzaga kelardi. Shu sababli biz tavakkalga qo‘l urmadik.
