«Spesiya» uchun mavsumning hal qiluvchi pallasi boshlanmoqda. Hozir klub «jon» saqlash hududidan 11 ochkolik farq bilan oldinda, lekin so‘nggi paytlarda jamoaning natijalari yaxshimas. 2022 yili «Spesiya» «A» seriyada 10ta o‘yin o‘tkazdi: 2 g‘alaba, 2 durang va 6 mag‘lubiyat. Yutqazishlarning oxirgisi 15 aprel sanasiga to‘g‘ri keldi - o‘z uyida «Inter»ga imkoniyat boy berildi.

Mazkur uchrashuv bilan bog‘liq kulgili voqeaga e’tibor qaratmoqchimiz. Yarim himoyachi Mbala Nzola joriy mavsum 22ta o‘yinda qatnashdi, ularning 10tasini boshlang‘ich tarkibda boshladi. Ammo bu yil uni asosan zaxira vakili sifatida ko‘ryapmiz. «Inter»ga qarshi bahsda ham shunday bo‘ldi. Nzola 60-daqiqada maydonga tushdi, ammo bor-yo‘g‘i 10 daqiqa to‘p surdi, xolos. Sabab g‘alati - qulog‘idagi ziragini yecholmadi.

«A» seriya qoidalarining 4-bandida shunday yozilgan: «Barcha taqinchoqlar taqiqlangan va ular bilan maydonga tushilishiga yo‘l qo‘yilmaydi. Ularni lentalar bilan yopish ham mumkin emas. Agar futbolchining taqinchog‘i bo‘lsa, hakam uni yo vaziyatni o‘nglashi uchun maydon chetiga chiqaradi yoki dastlabki tanaffusdayoq uning o‘rniga boshqa o‘yinchi tushishini ta’minlaydi».

Nzola aynan shu tartibga zid ish qilgani uchun noqulay ahvolga tushib qoldi. 66-daqiqada u Samir Xandanovich darvozasi tomon zarba yo‘llab, burchak zarbasi ishladi. Shu pallada hakam futbolchining qulog‘iga nimadir yopishtirilganini ko‘rdi va maydon chetiga chiqib, ziragini yechishi kerakligini uqtirdi. Bu borada Nzolaga «Spesiya» shifokori ko‘maklashdi, lekin birgalikda ham vaziyatni o‘nglay olishmadi.

«Spesiya» deyarli 5 daqiqani bir kishi kam bo‘lib o‘tkazdi, 70-daqiqada esa Nzolaning o‘rniga Antist Janis tushirildi. Kameralar zaxira o‘rindig‘ida o‘tirgan Nzolani darhol topishdi: u xafa edi, qulog‘ida esa chandiq ko‘rindi.