«Специя» учун мавсумнинг ҳал қилувчи палласи бошланмоқда. Ҳозир клуб «жон» сақлаш ҳудудидан 11 очколик фарқ билан олдинда, лекин сўнгги пайтларда жамоанинг натижалари яхшимас. 2022 йили «Специя» «А» серияда 10та ўйин ўтказди: 2 ғалаба, 2 дуранг ва 6 мағлубият. Ютқазишларнинг охиргиси 15 апрель санасига тўғри келди - ўз уйида «Интер»га имконият бой берилди.

Мазкур учрашув билан боғлиқ кулгили воқеага эътибор қаратмоқчимиз. Ярим ҳимоячи Мбала Нзола жорий мавсум 22та ўйинда қатнашди, уларнинг 10тасини бошланғич таркибда бошлади. Аммо бу йил уни асосан захира вакили сифатида кўряпмиз. «Интер»га қарши баҳсда ҳам шундай бўлди. Нзола 60-дақиқада майдонга тушди, аммо бор-йўғи 10 дақиқа тўп сурди, холос. Сабаб ғалати - қулоғидаги зирагини ечолмади.

«А» серия қоидаларининг 4-бандида шундай ёзилган: «Барча тақинчоқлар тақиқланган ва улар билан майдонга тушилишига йўл қўйилмайди. Уларни ленталар билан ёпиш ҳам мумкин эмас. Агар футболчининг тақинчоғи бўлса, ҳакам уни ё вазиятни ўнглаши учун майдон четига чиқаради ёки дастлабки танаффусдаёқ унинг ўрнига бошқа ўйинчи тушишини таъминлайди».

Нзола айнан шу тартибга зид иш қилгани учун ноқулай аҳволга тушиб қолди. 66-дақиқада у Самир Ханданович дарвозаси томон зарба йўллаб, бурчак зарбаси ишлади. Шу паллада ҳакам футболчининг қулоғига нимадир ёпиштирилганини кўрди ва майдон четига чиқиб, зирагини ечиши кераклигини уқтирди. Бу борада Нзолага «Специя» шифокори кўмаклашди, лекин биргаликда ҳам вазиятни ўнглай олишмади.

«Специя» деярли 5 дақиқани бир киши кам бўлиб ўтказди, 70-дақиқада эса Нзоланинг ўрнига Антист Жанис туширилди. Камералар захира ўриндиғида ўтирган Нзолани дарҳол топишди: у хафа эди, қулоғида эса чандиқ кўринди.