“Andijon” jamoasi o‘z maydonida “Mash’al”ga qarshi bahsda yana mardonavor o‘yin ko‘rsatib 2:1 hisobida g‘alaba qozondi.
Uchrashuvdan keyin tashkil etilgan matbuot anjunida mezbonlar ustozi Viktor Kumikov ishtirok etdi.
- Viktor Balyutovich, avvalo uchrashuv borasida nimalarni ayta olasiz?
- Barchangiz ko‘rdingiz, o‘yin ancha qiyin o‘tdi. Superligaga chiqmoqchi bo‘lgan klublar o‘rtasidagi uchrashuv doimo og‘ir kechgan. “Mash’al” bekorga 1-o‘rinda emasdi va hali mag‘lubiyatga uchramagandi. Bugungi natija biz uchun juda muhim edi va bunga erishdik. O‘yinchilar ruhiy tomondan o‘zlarini qo‘lga olishga harakat qilishdi. Darvozalar oldida xavfli vaziyatlar ko‘p bo‘ldi. Biz birinchi bo‘limda shunday vaziyatlarni ko‘pini o‘tkazib yubordik. Kamchiliklarimiz ustida yana ishlaymiz. Axir Moskvani ham birdaniga qurishmagan-ku!
- Umuman olganda, o‘yindan to‘liq qoniqdingizmi?
- Qachonki, men g‘alaba qozonsam shunda hammasidan qoniqqan bo‘laman. Futbolning chiroyli tomoni shundaki, sen g‘alaba qozonsang hammasi zo‘r bo‘ladi.
- Nima uchun asosiy tarkibda darvozabon Xurshid Xodjayevni maydonga tushirdingiz?
- Bizda ikkita teng kuchga ega bo‘lgan darvozabonlar bor. Kim o‘yinga 100 foiz tayyor bo‘lsa, o‘shani tushiraman. Balki keyingi uchrashuvda Eldor Adhamovni maydonga tushirarmiz.
- Nima sababdan ilk o‘zgarishni 80-daqiqadan keyin amalga oshirdingiz?
- O‘yindan kelib chiqib, shunday qarorga keldim. Biz mag‘lubiyatga uchrayotgandik. Shularni hisobga olib kechroq o‘yinchi almashtirishga qaror qildim. O‘yinchi almashtirsam, balki u xato qilib qo‘ysa-chi? Shularni hisobga oldim. Ikkinchi bo‘limda o‘yinni holatidan kelib chiqib futbolchilarni almashtirishga qaror qildim. Bizni zaxiramizda yosh o‘yinchilar bor. Mag‘lubiyatga uchrayotgan chog‘imizda yoshlarni maydonga tushirishni unchalik xohlamadim. Agar kutilmaganda ular xatoga yo‘l qo‘yishsa yanada qiyin holatga tushib qolishimiz mumkin edi. Futbolchilarni ruhiy holati bilan bog‘liq jarayon bo‘lganligi sababli jamoani qiyin ahvolga solib qo‘ygim kelmadi. Shaxsan men yoshlarni ko‘proq maydonga tushirishni xohlayman. Ammo hisob 2:0 va undan kattaroq hisoblarda yutayotgan bo‘lsak, bu ishni bajarsam bo‘ladi. Lekin mag‘lubiyatga uchrayotgan chog‘imizda buning mavridi emasdi. Bunday qiyin uchrashuvlarda kam o‘ynayotgan o‘yinchilarni tavakkal qilib maydonga tushirib bo‘lmaydi.
