Angliya chempionatining 36-turi doirasida «Manchester Yunayted» klubi safarda «Brayton» bilan to‘qnash kelib, kutilmaganda, yirik hisobda imkoniyatni boy berib qo‘ydi.

Mezbonlar 15-daqiqada Kaysedoning goli evaziga hisobni ochishgan bo‘lsa, mankunianliklar tanaffusga qadar raqib darvozasiga birorta aniq zarba yo‘llay olishmadi.

Ikkinchi taymning dastlabki 15 daqiqasida "Brayton" "qizil iblislar" darvozasiga naq 3 marta yo‘l topib, hisobni 4:0 ko‘rinishiga keltirib qo‘ydi.

Rangnik shogirdlari qolgan daqiqalarda vaziyatni o‘nglashga harakat qilishdi. Ammo ularga omad kulib boqmadi.

Shu tariqa, "MYU" Premyer-liganing joriy mavsumida kuchli to‘rtlikka kira olmaydigan bo‘ldi. "Brayton" esa o‘z ochkolarini 47taga yetkazdi va 9-o‘ringa ko‘tarilib oldi.

Angliya premyer-ligasi, 36-tur
Brayton – Manchester Yunayted 4:0 (1:0)
Gollar: 1:0 – 15 Kaysedo, 2:0 – 49 Kukurelya, 3:0 – 57 Gross, 4:0 – 60 Trossard.
Brayton – Sanches, Dank, Veltman, Kukurelya, March (Lempti, 76), Gross, Bissuma, Mak Allister (Uebster, 67), Kaysedo, Uelbek, Trossard (Mope, 83).
Manchester Yunayted – De Xea, Diogu Dalot, Varan, Lindelef, Telles, Mata (Maguayr, 70), Matich (Kavani, 46), Brunu Fernandesh, Maktomini, Ronaldu, Elanga (Fred, 46).
Ogohlantirishlar: Ronaldu (45), Diogu Dalot (47).