“Andijon” klubining imijini oshirish yo‘lidagi ishlar faol tarzda olib borilmoqda. Ayniqsa, bu borada “Yulduzlar biz haqimizda” rukni ayni muddao. Bu orqali "Andijon" haqida O‘zbekistondan tashqarida ham ma’lumotlarga ega bo‘lishyapti.  

Yevropa Chempionlar ligasida “Real”ni o‘z uyida mag‘lub etgan klubni bilasizmi? Ha, bu o‘sha “Sherif”! Yodingizda bo‘lsa, “Santyago Bernabeu”da Moldova chempioni “Real”ni 1:2 hisobida mag‘lubiyatga uchratgandi. O‘shanda hamyurtimiz Jasur Yaxshiboyev gol ham urgandi-ya!

“Sherif” bosh murabbiyi Yuriy Vernidub mazkur g‘alabadan keyin yanada mashhurlikka erishgani yodimizda. O‘sha Yuriy Nikolayevich “Andijon” matbuot xizmatiga jamoamiz xususida bilganlarini aytib berdi.

"Men bosh murabbiy Viktor Kumikovga “Andijon” bilan Pro ligada munosib ishtirok etib, qisqa tanaffusdan so‘ng Superligaga qaytishini tilab qolaman. Eng yaxshi tilaklarim shundan iborat.

Albatta, Viktor Balyutovich bilan shaxsan tanishman. U bilan bir necha marta uchrashganman va qanday saviyadagi murabbiy ekanligidan xabardorman. Vaqti-vaqti bilan bog‘lanib turardik. Lekin oxirgi paytlarda buning imkoni bo‘lmayapti.

Faqat shuni aytishim mumkinki, bu insonga “Andijon” bilan faqat g‘alabalar qozonishida omad yor bo‘lishini istayman. Har qanday holatda ham klubga keyingi faoliyatida muvaffaqiyatlar tilayman.

Agar siz andijonlik muxlislarni O‘zbekistondagi birinchi raqamli ishqibozlar ekanligini ta’kidlayotgan ekansiz, u holda bundan xursandman. Shunday muxlislarga ega bo‘lgan klubning o‘rni esa kuchlilar safida bo‘lmog‘i darkor!", — dedi Vernidub.

“Andijon” matbuot xizmati.