Balki 2022 yilning eng shov-shuvli transferi yozgi transfer oynasi ancha oldin sodir bo‘lgandir. Endi rasman Erling Xoland - "Manchester Siti" futbolchisi!
To‘rt yil davomida Yevropaning deyarli barcha grand klublari qiziqishiga sababchi bo‘lgan Erling Xolandning transferi "Man Siti"ga qanchaga tushishi, norvegiyalik futbolchining maoshi va kelishuv amalga oshishida yordamga kelgan uchinchi shaxslar qancha foyda ko‘rganini aniqlashga harakat qilamiz.
Deyarli barcha "Real" Xoland bilan kelishib olgani, futbolchining otasi Madriddan uy sotib olganini muhokama qilayotgan bir vaqtda "shaharliklar" norvegiyalikni ishontirish uchun barcha usullarni qo‘llashdi. Va yakunda bular o‘z foydasini berdi desak mubolag‘a bo‘lmaydi.
Transfer qanday sodir bo‘ldi?
Turli manbalarga ko‘ra, "Manchester Siti" vakillari Dortmundning "Borussiya" klubi hujumchisining manfaatlarini himoya qilgan sobiq agent Mino Rayolaning oldiga kasalxonaga tashrif buyurishgan. Bu kelishuvga erishishda asosiy omil bo‘lib xizmat qilgan. Shuningdek, yaqin kunlarda ingiliz klubi bilan amaldagi shartnomasini 2025 yilgacha uzaytirishi kutilayotgan Xosep Gvardiolaning asosiy sharti aynan Xolandni sotib olish edi. Futbolchining o‘zini ham ispan mutaxassisi bilan ishlash kelishuvning yana biri omili sifatida qaralmoqda.
Kelishuv "shaharliklar"ga qanchaga tushdi?
Transfer narxi bu kelishuvning eng qiziqarli va noaniq qismidir. The Telegraph xabariga ko‘ra, "Manchester Siti" Xolandni sotib olish uchun "asalarilar" qo‘ygan tovon pulini to‘lashadi. Shu bilan birga ular yana bir qancha qo‘shimcha xarajatlarga ham duch kelishadi. Ular quyidagilar:
— 75 million yevro Xolandning tovon puli
— 125 million yevro - shartnoma bonusi va futbolchining 5 yillik umumiy maoshi
— 50 million yevro Xolandning agentlari va vakillariga qo‘shimcha to‘lovlar.
Shu tariqa, "Man Siti" futbolchining transferi uchun umumiy miqdorda 250 million yevrodan ortiq mablag‘ sarflaydigan bo‘ldi. Bu vaziyatdan "Borussiya" biroz afsuslansa arziydi. Chunki dortmundliklar sayyoramizning hozirgi vaqtdagi eng kuchli 3 ta markaziy hujumchilari qatoriga kiradigan Xoland transferidan bor yo‘g‘i 75 million ishlamoqda. Taqqoslash uchun, "Manchester Yunayted" Xarri Maguayr uchun "Lester" hisob raqamiga 93,5 million yevro o‘tkazib bergan bo‘lsa, Jeydon Sancho mankunianliklarga 80 millionga tushgan. Xa, aytgancha, Sancho aynan "asalarilar" safidan "MYU" tarkibiga borib qo‘shilgan.
Shu o‘rinda qiziqarli savol tug‘iladi. Asosiy o‘yin uslubi mayda paslar orqali raqibni "yanchib" tashlaydigan jamoada Xoland o‘z o‘rnini topa oladimi? Gvardiola "terminator"dan qanday foydalanadi? Buni kelasi 2022/23 yilgi mavsumda bilib olamiz.
